अभिनेता नाजिर हुसेनले ढाका टोपी दिवसको शुभकामना दिँदै आफूलाई मान्छे बन्न दिन आग्रह गरेका छन् ।

आइतवार सामाजिक सञ्जालमा ढाकाटोपी लगाएको तस्विरसहित स्टाटस् लेख्दै उनले नागरिकता वा पासपोर्टमा लेखिएको नाम पढेर विभिन्न अनावश्यक प्रश्नहरूको सामना गर्नुपरेको दुखेसो पोखेका छन् । आफ्नो वंशजको नागरिकता वा पासपोर्टमा मोहमद नाजिर हुसेन नाम पढेर कतिपयले ‘तपाई इण्डियन मुस्लिम कि नेपाली मुस्लिम ?’,  ‘तपाई हिन्दू कि मुसलमान ?’ जस्ता प्रश्नको सामना गर्नुपरेको गुनासो गरेका हुन् ।

बारास्थित सिमरामा जन्मे–हुर्केका नाजिर मुस्लिम समुदायका हुन् । यद्यपि, उनी हिन्दू परम्परालाई पनि उतिक्कै सम्मान गर्छन् । उनी ईद पनि मनाउँछन् र भाइटीका पनि लगाउँदै आएका छन् ।

‘मान्छे बन्न खोज्दैछु । मान्छे बन्न दिनुस्’ नाजिरले अगाडि लेखेका छन् ‘सुन्नुस् म पनि यही माटोको हो । मेरो शरीरमा पनि रगत नै हो बग्ने । देशको कुरा आउँदा तपाईँलाई जति दुख्छ, मलाई पनि त्यति नै दुख्छ । तपाईँलाई जति खुशी लाग्छ, मलाई पनि त्यति नै खुसी लाग्छ ।’