शीतलहर र हिमपातको जोखिम न्युनीकरणमा जुट्न सीडीओलाई गृहमन्त्रीको निर्देशन

उपप्रधान एंव गृहमन्त्री रवि लामिछानेले तराईमा शीतलहर र उच्च हिमाली जिल्लाहरूमा हिमपातका कारण हुने जोखिम न्युनीकरणका लागि तयारी अवस्थामा जुट्न प्रमुख जिल्ला अधिकारी (सीडीओ) हरूलाई निर्देशन दिएका छन् ।

नेपाल सरकारको प्रतिनिधिको रूपमा रहेका सीडीओ तथा जिल्लामा शान्ति सुरक्षा तथा अमनचयन कायम गर्न अहोरात्र खटिने सुरक्षाकर्मीहरूलाई निर्देशनको क्रममा सोमवार भर्चुअल सम्बोधन गर्दै मन्त्री लामिछानेले बढ्दो चिसोका कारण कुनै पनि नागरिकले ज्यान गुमाउने परिस्थिति बन्न नदिन विपद् व्यवस्थापनका तयारीमा लाग्न निर्देशन दिए ।

यसका लागि आवश्यक समन्वय तथा व्यवस्थापनमा मन्त्रालयले पहल गर्ने बताए । विपद्को सामना गरिरहेका नागरिकसामु सकेसम्म आफैं पुग्न र दुःखमा परेकाहरूलाई अभिभावकत्व प्रदान गर्ने प्रतिबद्धताका लागि पनि सीडीओहरूलाई मन्त्री लामिछानेले निर्देशन दिए । नागरिकका गुनासो तथा समस्यालाई सधैं उच्च प्राथमिकतामा राखेर सेवा दिन, सेवामा सहज पहुँच विस्तार, प्रविधिमैत्री र सद्भावपूर्ण व्यवहार अपनाउन पनि निर्देशन दिइएको छ ।

सुशासनलाई ध्यानमा राखेर भ्रष्टाचारविरुद्ध शून्य सहनशीलताप्रति आफू र आफ्नो पार्टी प्रतिबद्ध रहेकाले कुनै पनि व्यक्ति वा संयन्त्रयको दबाब र प्रभावमा नपर्न समेत गृहमन्त्री लामिछानेको निर्देशन छ । नागरिकले राज्यबाट पाउने सेवामा ढिलासुस्ती, झन्झटिलो र रुखो व्यवहार भोग्नुपर्ने गुनासो आजकै दिनबाट हटाउन पनि उनले निर्देशन दिए ।

सेवा प्रवाहमा कार्यालयको आन्तरिक व्यवस्थापनबाटै गर्न सकिने तथा मन्त्रालयबाट आवश्यकताअनुसार थप सहजीकरण गरी मौजुदा कानून, साधन र स्रोतको सीमामा रही सम्पादन गर्न सकिने सुधार एवं प्रक्रिया सरलीकरणका विषयहरू समावेश गरी १५ दिनभित्र सेवा प्रवाह सुधार कार्यान्वयन योजना बनाई पठाउन निर्देशन दिए ।

यसका साथै मुलुकभर मिटर व्याजीको मारमा परेका नागरिकहरूले अझै सुनुवाइ नभएको गुनासो गरिरहेकाले यसप्रति पनि सम्बन्धित अधिकारीको ध्यानाकर्षण हुनुपर्ने उनको सुझाव थियो । चोरी निकासी तथा पैठारीमा संलग्न हुनेहरूलाई यथाशीघ्र कानूनको दायरामा ल्याउन र जिल्ला प्रशासन कार्यालयहरूबाट प्रवाह हुने नागरिकता, राष्ट्रिय परिचयपत्र लगायतका सेवाका साथै प्रहरीमार्फत हुने शान्ति सुरक्षा लगायत नियमित सेवा प्रवाहलाई समेत चुस्तदुरुस्त बनाउन सीडीओलगायत सुरक्षा निकाय प्रमुखहरूलाई मन्त्री लामिछानेले निर्देशन गरेका छन् ।