राष्ट्रिय प्रजातन्त्र पार्टीका अध्यक्ष राजेन्द्र लिङ्देनले पृथ्वी जयन्तीमा सरकारले दिएको सावर्जनिक बिदाका सम्बन्धमा सरकारलाई आभार प्रकट गरेका छन् ।

राष्ट्र निर्माताप्रति सम्मान गर्दा कसैले पनि हीनताबोध गर्न नहुने भन्दै लिङ्देनले पृथ्वीनारायण शाहप्रति सबैले गौरवबोध गर्नुपर्ने बताए । 

‘राष्ट्रनिर्माताप्रति सम्मान गर्दा कसैले हीनताबोध गर्नुपर्दैन । पृथ्वीनारायण शाह भएरै आज प्रधानमन्त्रीमा पुष्पकमल दाहाल प्रचण्ड हुनुभएको छ,’ प्रतिनिधिसभमा विश्वासको मतबारेको छलफलमा भाग लिँदै उनले भने, ‘त्यसैले कसैले हीनताबोध नगरौं । पृथ्वीनारायण शाहप्रति गौरवबोध गर्दा पछाडि पर्किएको हुँदैन । पृथ्वी जयन्ती र एकता दिवस कुनै दलको, होइन सबैको साझा हो ।’

अहिलेको सरकारमाथि नागरिकसँग जोडिएका धेरै आशा र सपनालाई पूरा गर्ने दायित्व रहेको भन्दै उनले अब विकास र समृद्धिबाहेक अर्को विकल्प नभएको बताए ।