आइतवार पोखरामा यती एयरको विमान दुर्घटनामा निधन भएकी लोकदोहोरी गायिका निरा छन्त्यालको निधनमा भोलि (सोमबार) देशभरका दोहोरी साँझहरु बन्द गरिने भएको छ ।

राष्ट्रिय लोक तथा दोहोरीगीत प्रतिष्ठानले गायिका छन्त्यालको निधनमा सोमबार देशभर शोक मनाउने निर्णय गरेको हो ।

आइतवार बसेको प्रतिष्ठानको आकस्मिक बैठकले सोमबार प्रतिष्ठानका सबै कार्यक्रमहरू रद्ध गर्ने समेत निर्णय गरेको एक विज्ञप्ति जारी गर्दै जानकारी दिइएको छ । 

प्रतिष्ठानका अध्यक्ष रमेश बीजीको अध्यक्षतामा बसेको बैठकले गायिका छन्त्यालको निधनमा केन्द्र, प्रदेश र सबै शाखामा शोक मनाउने निर्णय गरेको हो ।

२२ वर्षिया गायिका छन्त्यालको निधनले प्रतिष्ठान शोकमग्न भएको विज्ञप्‍तिमा उल्लेख छ ।

नेपाली लोकदोहोरी गायनको क्षेत्रमा प्रस्तुतिको हिसावले अब्बल, मिलनसार, स्टेज कार्यक्रमहरूमा सुन्दर प्रस्तुति दिएर सबैको मन जित्न सफल गायिका छन्त्यालको निधनले प्रतिष्ठानलाई अपूरणीय क्षति पुगेको समेत विज्ञप्‍तिमा उल्लेख छ ।

बागलुङ घर भएकी गायिका छन्त्यालले विष्णु खत्री, नरेश खाती, प्रकाश पराजुली लगायतसँग सहकार्य गरेका गीतहरू आफ्नै युट्युब च्यानलमार्फत सार्वजनिक गरेकी थिइन् ।

उनी लाइभ दोहोरी गायनमा समेत सक्रिय थिइन् । एक सांगीतिक कार्यक्रममा सहभागी हुन उनी पोखरा उडेकी थिइन् ।