गायिका एलिना चौहान फेरि चर्चामा आएकी छिन् ।

‘धोकेबाज हौ तिमी’ गीतको कारण चर्चामा रहिरहेकी गायिका चौहान यसपटक एक अन्तवार्तामा दिएको जवाफका कारण चर्चाको केन्द्रमा रहेकी हुन् ।

अन्तवार्तामा उनले दिएको जवाफको अंश सामाजिक सञ्जालमा भाइरल भइरहेको छ । त्यस्ता अंशहरूमा उनको आलोचना गरिएको छ ।

शनिवार प्रशारित टेलिभिजन कार्यक्रम ‘द प्रकाश सुवेदी शो’मा अतिथिको रूपमा पुगेकी उनलाई सञ्चारकर्मी प्रकाश सुवेदीले रवि लामिछानेको फोटो देखाएर कुन रूपमा चिन्नुहुन्छ भनेर सोधेका थिए । जवाफमा गायिका चौहानले व्यक्ति चिन्ने भएपछि कुनै पनि रूपमा नचिन्ने बताएकी थिइन् ।

‘पर्सनल्ली उहाँ यस्तो मान्छे भन्ने थाहा छैन । उहाँ रवि लामिछाने हो भनेर चिन्छु । रुपअनुसार चाहिँ चिन्दिन्’ उनले भनेकी छिन् ।

उक्त जवाफलाई लिएर चौहान अहिले सामाजिक सञ्जालमा ट्रोलसँगै आलोचित बनिरहेकी हुन् । 

अन्तवार्तामा दिएको जवाफको सानो अंशलाई लिएर आलोचित भएपछि गायिका चौहानले आफ्नो धारणा सार्वजनिक गरेकी छिन् । उनले सामाजिक सञ्जालमा स्टाटस लेख्दै आफूले जानी जानी कसैप्रति गलत धारणा नराखेको बताएकी छिन् । 

‘उक्त कार्यक्रमको ‘कुन रुपमा चिन्नुहुन्छ ?’ भन्ने सेगमेन्टमा रवि दाइको फोटो देखाएर कार्यक्रम संचालकले उहाँलाई कुन रुपमा चिन्नुहुन्छ भनेर गरेको प्रश्नमा मैले उहाँलाई प्रसनल्ली चाहिँ कुन रुपमा चिन्छु भन्नुपर्ने थियो’ उनले लेखेकी छिन् ‘तर अहिलेसम्म देखभेट नभएको र अन्तवार्ता/कार्यक्रम नभएको हुनाले प्रसनल्ली चाहिँ कुनै रुपमा चिन्दिन् भनेर भनेकी थिएँ । रवि दाइ एक कुशल पत्रकार, समाजसेवी र युवा नेता हो । त्यसमा कुनै शंका छैन र सायद नचिन्ने कमै हुनुहुन्छ होला ।’

गायिका चौहानले उक्त अन्तवार्तामा धेरै कुराहरू पनि भनेको भएपनि त्यसको चर्चा नभएको तर टिकटकमा सानो क्लिप्स काटेर अर्थको अनर्थ लगाएर गलत व्याख्या गर्दै हदैसम्म गिरेर गाली गरिरहेको उनको गुनासो छ ।

उनले भावनामा बगेर भन्दापनि अन्तवार्ता हेरेर मात्र धारणा बनाउन अनुरोध गरेकी छिन् । ‘एक पटक आँखा चिम्म गरेर सोच्नु त ! मैले त्यसरी गाली खानुपर्ने केही गरेकी छु र ?’ उनले अनुरोध गरेकी छिन् ‘म हजुरहरुकै छोरी–चेली, दिदी–बहिनि हो त्यसैले त्यति तल झरेर गाली नगरिदिनुहोला ।’

उनले आफूले जानि जानि कुनै गल्ती नगरेको बताउँदै अगाडि भनेकी छिन्, ‘जानी जानी कसैप्रति गलत धारणा राखेकी छैन । तरपनि मेरो कुराले कसैको भावनामा आँच पुगेको भए माफी चाहन्छु ।’