नेपाली कांग्रेसकी नेता, केन्द्रीय सदस्य तथा प्रतिनिधिसभा सदस्य एवं पार्टी सभापति शेरबहादुर देउवाकी पत्नी आरजू राणा देउवाले नेपालको आईक्यूको अवस्था एकदमै कमजोर रहेको बताएकी छन्।

आज (शुक्रवार) कैलालीस्थित धनगढीमा नेपाल विद्यार्थी संघ (नेविसंघ) ले आयोजना गरेको स्ववियु निर्वाचन लक्षित प्रशिक्षण कार्यक्रममा उनले  आफूले भर्खरै मात्र एउटा रिपोर्ट पढेको भन्दै त्यो रिपोर्टमा नेपालको आइक्यूको दुखलाग्दो अवस्था दर्शाइएको दाबी गरिन्।

उनले भनिन्, ‘एउटा रिपोर्ट हेरेँ, त्यसमा यस्तो कुरा छ। के भन्ने अब ? दु:खलाग्दो कुरा छ। संसारको सबैभन्दा कम आईक्यू हुने देशमध्ये नेपाल पनि एक रहेछ। हाम्रो शिक्षाको प्रणालीमा केही पनि मिलेको छैन।’

अहिलेको शिक्षा प्रणाली परिवर्तन गर्नुपर्ने उनले जिकिर गरिन्। 

यस्तै उनले अहिलेको पुस्ता सामाजिक सञ्जाल र टिकटकमा रुमलिएको भन्दै दुःख व्यक्त गरेकी छन्।

अहिलेको पुस्ता धेरै ट्यालेन्ट होला भनेर आफूलाई लागे पनि त्यस्तो नभएको उनले बताइन्। 

'अहिलेको आइक्यूको ग्लोबल रिपोर्टले चाहिँ त्यस्तो देखाएन, किनभने अहिलेको जेनेरेसन टिकटकमा लागेको छ। त्यसमा भिडिओ बनाउँछ। यो ट्रेन्डचाहिँ राम्रो होइन। पहिला हामी एकदमै धेरै पढ्थ्यौँ तर अहिले त छोडिसके,’ उनले भनिन्। 

अहिलेका विद्यार्थी नेताहरूले विषयगत कुरा पनि अध्ययन गर्नुपर्ने उनले सुझाव दिइन्।