सत्ता सहयात्रामा खटपट आएपछि नेकपा एमालेका अध्यक्ष केपी शर्मा ओलीले प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल प्रचण्डप्रति आक्रोश पोखरेका छन् ।

प्रचण्डको नमै नलिई ओलीले बिरालोलाई कचौरामा दूधभात राख्दिए पुग्ने टिप्पणी गरे ।

‘जनयुद्धको नाममा प्रचण्डले नयाँ हिंसाको अभियान शुरु गर्नुभयो । त्यसपछि राज्य र गैरराज्यतर्फबाट धेरैको हत्या भयो । मैना सुनुवारदेखि यदु गौतमसम्मको हत्या भयो । त्यसका सञ्चालक शासनको कार्यकारी ठाउँमा छन्, लामो समयदेखि लगातार । २०६३ देखि नै छन्, प्रधामनन्त्री भएको तीनपल्ट भयो । २०६२ पछि कोही त्यति लामो समय सत्तापक्ष भएको छ, जता जोसँग मिलेर भएपनि सत्तामा हुने’, आइतवार काठमाडौंमा शहीद, बेपत्ता र घाइतेको सम्मानमा आयोजित कार्यक्रममा ओलीले भने, ‘एउटा प्रवृत्ति के देखन्छ भने, बिरालो किन्नु पर्दैन, कचौरामा दूधभात जसले दिन्छ छिमेकीमा छिरिहाल्ने।’

ओलीले माओवादी आन्दोलनमा लागेका अरूको विचल्ली भए पनि प्रचण्डका परिवारका सदस्यको भने मालामाल रहेको टिप्पणी गरे ।

‘परिवारका मान्छे धनी नै भएका होलान्। भाइ–भजिता, मान्जाभान्जी राम्रो ठाउँमा पुगेका होलान् । अहिले पनि प्रधानमन्त्रीजीले घाइते जम्झिनुभएको छ कि छैन ? आफ्नै स्वार्थ र परिवार सम्झिनु हुन्छ कि ? कसकाविरुद्ध किन जनयुद्ध चलाउनु भएको थियो ?’ ओलीले प्रश्न गरे ।

प्रचण्डले अस्तिसम्म आफूलाई छक्काउने भाषा बोलेको ओलीले आरोप लगाए ।

‘अस्तिको दिनसम्म मसँग छक्काउने भाषा बोल्नुभयो । तर पुष्पकमलजीलाई मैले नचिनेको होइन, हातमा चक्कु लिएर बस्नु भएको थियो, फूल लिएको भन्नुभयो । चक्कुजस्तो देखिएको फूल हो भन्नुभयो । तपाईंले भनेपछि फूल भन्दै बसेँ’, ओलीले भने ।