नेपाली कांग्रेस, नेकपा माओवादी केन्द्रसहित सत्ता गठबन्धनका ९ दलले फागुन २५ गते हुने राष्ट्रपति चुनावका लागि बुधवारसम्म काठमाडौं आउन मतदाता (सांसद) लाई निर्देशन दिएका छन् ।

कांग्रेस संसदीय दलको कार्यालयमा मंगलवार बसेको ९ दलको बैठकले मतदाताका लागि समयमै आउन निर्देशन दिएको काग्रेस प्रमुख सचेतक रमेश लेखकले जानकारी दिए ।

‘मतदाता (सांसद) लाई समयमै मतदानस्थलमा आउन भनिएको छ । उनीहरू काठमाडौंमा आई पुगे/नपुगेको हेर्ने लगायत अन्य प्राविधिक विषयमा छलफल भयो,’ लेखकले भने । यसपटकको राष्ट्रपति निर्वाचनमा स्वस्तिक छाप लगाउने भएकाले यसबारे आफ्ना सांसदलाई जानकारी गराउनेबारे छलफल भएको उनले जानकारी दिए । 

बैठकमा सहभागी अर्का एक नेताले भोलि बिहानसम्म काठमाडौं आइसक्न प्रदेश सांसदलाई निर्देशन दिइएको बताए ।
 
बैठकपछि कांग्रेस उपसभापति पूर्णबहादुर खड्काले निर्वाचनको प्राविधिक तयारीबारे मात्र छलफल भएको बताए । ‘राष्ट्रपति निर्वाचनमा एकै ठाउँ मतदान गर्छाैं, त्यसकै जगमा अगाडि बढ्छौं । अन्य विषयमा हामी पछि मात्र छलफल गर्छाैं,’ सत्ता साझेदारीबारे सोधिएको प्रश्नमा नेता खड्काले भने ।

निर्वाचन आचारसंहिताका कारण बुधवार गर्ने भनिएको संयुक्त प्रशिक्षण स्थगित गरिएको उनले बताए ।