कांग्रेस केन्द्रीय कार्यसम्पादन समिति र संसदीय समितिको बैठकले १० वैशाखमा हुने उपनिर्वाचनका लागि २ क्षेत्रमा उम्मेदवार सिफारिस गरेको छ ।

तनहुँ २ मा नेविसंघका पूर्वसभापति गोविन्द भट्टराई र चितवन २ मा पूर्वजिल्ला सभापति जीतनारायण श्रेष्ठलाई उम्मेदवार बनाउने निर्णय गरेको जानकारी प्रवक्ता डा. प्रकाशशरण महतले दिए । 

बारा २ मा भने १९ चैतमा पुनः केन्द्रीय कार्यसम्पादन समिति र संसदीय समितिको संयुक्त बैठक बसेर आवश्यक निर्णय गर्ने उनले बताए। 

बारा २ मा जसपा अध्यक्ष उपेन्द्र यादव उम्मेदवार बन्दैछन् । यसैले कांग्रेसले पनि उम्मेदवार नउठाई उनैलाई सहयोग गर्ने नीति लिएको छ । तर २० चैतमा उम्मेदवारी मनोनयन गर्ने अघिल्लो दिन मात्रै कांग्रेसले घोषणा गर्ने भएको हो । 

कार्यसम्पादन समितिको बैठकले मिटरब्याजीबाट पीडित हुनेको समस्या समाधानका लागि पनि सरकारको ध्यानाकर्षण गराएको छ ।

‘मिटरब्याजी पीडितबाट आहत नागरिकको समस्याप्रति पार्टीको गम्भीर ध्यानाकर्षण भएको छ । कानुनी व्यवस्थासँगै आवश्यक समाधानका लागि सरकारले तत्परता देखाउनुपर्छ र समाधान गर्नुपर्ने निर्णय हामीले गरेका छौं,’ महतले भने। 

सरकारमा मन्त्री चयनबारे के निर्णय गर्‍यो कांग्रेसले ? 

बिहीबार बसेको कांग्रेस केन्द्रीय कार्यसम्पादन समितिको बैठकले पार्टीभित्र सबैसँग सल्लाह गरेर सभापति शेरबहादुर देउवाले सरकारमा मन्त्री पठाउने निर्णय गरेको छ ।

केन्द्रीय कार्यसम्पादन समितिको बैठकपछि प्रवक्ता डा. प्रकाशशरण महतले पार्टीले तोकेको योगदान, दक्षता, समावेशी र प्रादेशिक सन्तुलन मिलाएर सभापतिले मन्त्रीमा नाम पठाउने जानकारी दिएका छन् । 

‘मन्त्रिपरिषद्मा कांग्रेसले भाग लिनेबारे चर्चा भएको छ । कार्यसम्पमादन समितिले पहिले नै योगदान, दक्षता, समावेशी र प्रादेशिक सन्तुलनका आधारमा मन्त्री चयन गर्ने भनेको थियो । यसैलाई मध्यनजर गरेर सरकारमा सदस्य पठाउने निर्णय भएको छ’, महतले भने, ‘नामको विषयमा हामीले तोकेको मापदण्डलाई टेकेर सभापतिले सबैसँग छलफल गर्नुभएको छ । सल्लाह र सुझाव लिनुभएको छ । यसकै आधारमा सभापतिले प्रधानमन्त्रीलाई नाम दिनुहुन्छ । शपथ कहिले हुन्छ भन्ने प्रधानमन्त्रीले खबर गर्नुहोला ।’ 

रास्वपा सहभागिताबारे 

सरकार विस्तारमा राष्ट्रिय स्वतन्त्र पार्टी तत्काल सहभागी नहुने निर्णय कांग्रेसले गरेको छ । 

‘रास्वपाले सरकारलाई साथ दिएको छ । तर तत्काल होइन पछि सरकारमा कसरी जाने भन्नेमा उहाँहरूसँग परामर्श भएको होला भन्ने बुझेका छौं । अहिलेलाई यही निर्णय भएको छ,’  महतले भने ।

रास्वपालाई आगामी दिनमा सरकारमा समेट्नेबारे प्रधानमन्त्रीले नै परामर्श गर्ने जानकारी उनले महतले बताए। 

बिहीबार विस्तारित हुँदै गरेको मन्त्रिपरिषद् विस्तारमा कांग्रेस, माओवादी, जसपा, नेकपा एस, जनमत, लोसपा, नागरिक उन्मुक्तिसहितका दल सहभागी हुँदैछन् ।

तर १९ सिट भएको रास्वपाले भने तत्काल सरकारमा सहभागी नहुने जनाएकव छ। १० वैशाखमा हुने उपनिर्वाचनमा रास्वपाका सभापति रवि लामिछाने फेरि चितवन २ बाट निर्वाचन लड्दैछन् ।