कांग्रेसले सरकारमा ८ मन्त्रालय पाउँदा पार्टीभित्र डा. शेखर कोइराला पक्ष २ वटा मन्त्रालय लिनमा सहमत जस्तै थियो । तर आफैंले मन्त्रीमा पठाउन ठिक्क पारेर राखेका नेताको नाम पनि नदिइ शेखर पक्षले एकाएक ३ वटा मन्त्रालय पाउनुपर्ने अडान लिइदियो ।

यसैले शुक्रबार कांग्रेसका ४ जना मन्त्रीले मात्रै शपथ लिए । तर ४ जना मन्त्रीको टुंगो लागेन । 

शेखर पक्षले आफू निकटका पदाधिकारी र सिनियर नेतासँग छलफल गरेरै ३ वटा मन्त्री नपाए नाम नपठाउने निर्णय लियो । यसको जानकारी सभापति शेरबहादुर देउवालाई दियो ।

शेखर पक्षले नाम नपठाएपछि आन्तरिक समीकरण मिलाउन अप्ठ्यारो झेलिरहेका देउवालाई पनि बहाना मिल्न पुग्यो । यसैले उनले तत्काल ४ जना मात्रै मन्त्री पठाएका हुन् ।

तर आफैंले प्रस्ताव गरेकालाई मन्त्री बनाउन देउवा तयार भए पनि शेखर पक्षले २ को सट्टा ३ जनाको अडान लिनुमा भने अर्कै कारण रहेको बताइन्छ ।

कांग्रेसले पाउने भागबण्डामा देउवाले शेखर पक्ष, प्रकाशमान, सिटौला र शशांक पक्षलाई समेट्ने धेरै बुझाई थियो । तर शेखरलाई २ वटा मन्त्रालय दिएपछि ६ वटामा उनले आफू निकटकै नेतालाई मन्त्री बनाउने तयारी गरे ।

यसै अनुरुप मन्त्रीको नाम टुंग्याए । प्रकाशमानबाट मन्त्रीको दाबी गर्ने राजन केसी र शशांकको तर्फबाट दाबी गर्ने दीपक गिरी वा दीपक खड्का पनि मन्त्री नबन्ने पक्का भयो । सिटौला पक्षका नेता पनि मन्त्री नबन्ने चाल शेखर पक्षले पायो । यसैले ६ जना नै देउवा पक्षका मन्त्री हुनबाट रोक्न शेखर पक्षले  २ को सट्टामा ३ जनाको अडान लिन पुगेको हो ।

‘सबै पक्ष समेटिँदा २ वटा मन्त्रालयमा पनि मान्ने जस्तो हामीले गरेको हो । तर पार्टीमा अरु पक्ष सबै छुट्ने तर संस्थापनबाटै ६ जना मन्त्री हुने भएपछि हामीले पनि अडान लिँदै ३ मन्त्री पाउनुपर्ने निर्णय गरेका हौं’ सहमहामन्त्री बद्रि पाण्डेले लाेकान्तरसँग भने । 

यस्तो भएपछि देउवाले पटकपटक आग्रह गरे पनि शेखरले २ नाम नपठाउने अडान लिएका थिए ।

देउवाले प्रकाशमान र शशांक निकटलाई मन्त्री बनाएको भए शेखर पक्षले धनराज गुरुङ र डीगबहादुर लिम्बुलाई मन्त्रीमा पठाउने तयारी गरेको थियो ।

धनराजले सामान्य प्रशासन र लिम्बूले कानुन मन्त्रालय पाउने चर्चा पनि थियो ।  

अब सभापतिसँग शेखर कोइरालाले कुरा गरेर मिलाउने पाण्डे बताउँछन् । 

‘सभापतिसँग शेखर दाइले कुरा गरेर मिलाउने भन्ने भएको छ’ पाण्डेले भने, ‘भोलि कार्यसम्पादन समितिको बैठक पनि छ । यहाँ पनि कुरा उठ्न सक्छ ।’