दीपेन्द्र के. खनालको निर्देशनमा चलचित्र ‘पशुपति प्रसाद २ः भष्मे डन’को यतिबेला पशुपति परिसरमा धमाधम​ छायांकन भइरहेको छ । 

यो चलचित्रबाट अभिनेता विपिन कार्की एवं अभिनेत्री स्वस्तिमा खड्काको गेटअप लुक्स बाहिरिएको छ । छायांकनमा व्यस्त भइरहेका अर्का अभिनेता सौगात मल्लको लुक्स भने निर्माण टिमले सार्वजनिक गरेको छैन ।

यो चलचित्रको छायाङ्कनअघि अभिनेता सौगातले २ महिना पशुपति परिसरमा समय बिताएका थिए । 

निर्माण टिमका अनुसार उनी हरेक दिन पशुपतिनाथ परिसरमा पुग्थे । मास्क लगाएर सामान्य व्यक्तिसरह पशुपति पुगेर उनले त्यहाँको माहोल बुझ्ने प्रयास गर्दथे । त्यहाँ भेटिने व्यक्तिको आनीबानी, भाषा, भेषभूषासहित धेरै कुरा सिक्ने उनले प्रयास गरेका थिए । पशुपतिनाथ दर्शन गर्न आउने र त्यहाँ बस्दै आएका साधुहरूसँग समेत सौगातले कुराकानी गरेका थिए ।

कतिपय दिन उनी त्यहीँ बस्ने, त्यहीँ खानपिन समेत गरेका थिए । 

सौगात यस्ता सीमित अभिनेताभित्र पर्छन्, जो आफ्नो चरित्रभित्र छिर्न हरसम्भव तयारी गर्छन् । मिडियामा कम आउने उनले दर्शकमा आफ्नो कुशल अभिनय छाप छाडिसकेका छन् ।

‘पशुपति प्रसाद २ः भष्मे डन’ छायांकन भइरहँदा पनि सौगात कसैसँग खास्सै बोलचाल गर्दैनन् । लुक्स सार्वजनिक हुने डरले फ्यानहरुसँग पनि उनले तस्वीर खिचाउने गरेका छैनन् ।

निर्देशक दीपेन्द्र के. खनालका अनुसार ‘पशुपति प्रसाद २ः भष्मे डन’मा सौगात पात्र निकै रोचक छ ।

पशुपतिमा लामो समय बिताउँदा अहिले काम गर्न पनि सजिलो भएको अनुभव सौगातको छ ।

व्यावसायिक तथा समीक्षात्मक दुवै रुपमा सफल चलचित्र ‘पशुपति प्रसाद’को चरित्र केन्द्रित सिक्वेलको रुपमा निर्माण ‘पशुपति प्रसाद २ः भष्मे डन’ निर्माण भइरहेको हो ।

आगामी दशैंको फूलपातीमा प्रदर्शनमा आउने घोषणा भइसकेको चलचित्रमा यसअघि ‘पशुपति प्रसाद’मा शीर्ष भूमिकामा रहेका खगेन्द्र लामिछाने लेखक एवं निर्माताका रुपमा मात्र छन् ।