नेपाली कांग्रेस धनुषाको पार्टी कार्यालय भवन निर्माण गर्नका लागि प्रदेश सरकारले ४० लाख रुपैयाँ बजेट विनियोजन गरेको पाइएको छ ।

कांग्रेसका रामसरोज यादव भौतिक पूर्वाधार तथा यातायात मन्त्री बनेका बेला गत वर्ष २०७९/०८० मै उनले ४० लाख रुपैयाँ विनियोजन गरेका थिए ।

भवन निर्माणका लागि शुक्रवार शिलान्यास गरिएको छ । मधेश प्रदेश सरकारअन्तर्गत रहेको शहरी विकास तथा भवन निर्माण विभागले उपभोक्ता समितिमार्फत भवन निर्माण गर्न लागेको हो ।

शहरी विकास तथा भवन निर्माण विभागका प्रमुख समेत रहेका इन्जिनीयर विनोद यादवका अनुसार मधेश प्रदेश सरकारले विभिन्न संघ-संस्था आदिको भवन निर्माणका लागि बजेट विनियोजन गरेकोमा कांग्रेस धनुषाको पार्टी कार्यालय बीपी स्मृति भवन निर्माणका लागि विनियोजित बजेटबाट काम शुरू गरिएको हो ।

पार्टी कार्यालय भवन निर्माणका लागि सरकारी बजेट विनियोजन गर्न मिल्छ त भन्ने प्रश्नमा यादवले भने, 'त्यो त मिल्दैन होला । तर, रामसरोज यादव मन्त्री हुनुभएको बेला मन्त्रालयबाट नै बजेट विनियोजन भएको हुँदा हामीले उपभोक्ता समितिमार्फत अढाइ तल्ले घर निर्माण गर्न लगाएका छौं ।'

एउटा ब्लकमा साढे दुई तल्ले भवन र अर्को ब्लकमा सभा हल निर्माण गरिने भए पनि त्यति रकमले अपुग हुने हुँदा तत्काल ग्राउन्डको काम शुरू गरिएको यादवले बताए ।