राष्ट्रपति रामचन्द्र पौडेलको उपचार प्रक्रियाबारे लगातार प्रश्न उठेपछि शीतलनिवासले यसबारे प्रष्ट पार्ने प्रयास गरेको छ । राष्ट्रपतिको उपचारमा लापरबाही ढंगले राज्यकोषको दुरुपयोग भएको र स्वास्थ्यमा के समस्या भएको हो भन्नेबारे समेत गुपचुप राखिएको भन्दै सरोकारवालाले प्रश्न उठाउँदै आएका थिए । 

यससम्बन्धमा बुधबार भने राष्ट्रपतिको सचिवालयले स्वास्थ्यसम्बन्धी  र उठेका प्रश्नबारे स्पष्ट पार्ने कोशिस गरेको हो । 

राष्ट्रपतिको प्रेस सल्लाहकार किरण पोखरेलले स्वास्थ्यसम्बन्धी केही परीक्षणको रिपोर्ट अझै आउन बाँकी रहेको विज्ञप्तिमार्फत जनाएका छन् । उनले राष्ट्रपति पौडेलको भारतको नयाँ दिल्लीस्थित अल इण्डिया इन्स्टिच्युट अफ मेडिकल साइन्सेस (एम्स)मा उपचार भइरहेको र छातीमा इन्फेक्सन भएपछि त्यहाँ लैजानुपरेको बताएका छन् । 

“छातीको इन्फेक्सनका कारण त्रिभुवन विश्वविद्यालय शिक्षण अस्पताल, महाराजगञ्जमा भर्ना भई लगातार एन्टिबायोटिक चलाउँदा पनि प्रभावकारी नभएपछि चिकित्सकको सुझावअनुसार उहाँको भारतीय सरकारी अस्पताल एम्समा उपचार भइरहेको सर्वविदितै छ”, विज्ञप्तिमा जनाइएको छ ।

राष्ट्रपतिको नेपालमै उपचार गर्ने चाहना हुँदाहुँदै पनि चिकित्सकको टोली तथा प्रधानमन्त्री पुष्पकमल दाहाल ‘प्रचण्ड’ र उच्च राजनीतिक नेतृत्वको विशेष आग्रहमा उनी भारतमा उपचारका लागि जान गएको शीतलनिवासको भनाइ छ । यो कुरा प्रधानमन्त्री दाहालले सार्वजनिक कार्यक्रममा नै बताइसकेको विज्ञप्तिमा उल्लेख छ ।

“नेपाल सरकारको निर्णयबमोजिमको उपचार पद्धति कानून, नियम र निश्चित विधिअनुसार हुने स्पष्ट हुँदाहुँदै पनि राष्ट्रपति संस्थालाई नै विवाद पार्ने मनसायले केही सञ्चारमाध्यम तथा सामाजिक सञ्जालमा फैलाइएका भ्रामक सूचना र दुष्प्रचारप्रति हाम्रो गम्भीर ध्यानाकर्षण भएको छ”, विज्ञप्तिमा उल्लेख छ ।

राष्ट्रपति तथा उपराष्ट्रपतिको पारिश्रमिक तथा सुविधासम्बन्धी ऐन, २०७४ मा विदेश भ्रमण र उपचारका लागि विदेश जाने विषयलाई अलग–अलग व्यवस्था गरिएको प्रष्ट रहेको भन्दै सचिवालयले तर, ऐन कानून नै नबुझेजस्तो गरी राष्ट्रपतिका परिवारका सदस्यले दैनिक भ्रमण भत्ता पाउनेजस्ता आम नागरिकलाई दिग्भ्रमित पार्ने सूचना सम्प्रेषण भइरहेको दाबी गरेको छ ।