प्रमुख प्रतिपक्ष दल नेकपा (एमाले)का अध्यक्ष एवम् पूर्वप्रधानमन्त्री केपी शर्मा ओलीले आफूमाथिको आक्रमणमा पूर्व राजा र उनको परिवारको संलग्नता देखिएको आरोप लगाएका छन् । 

पार्टी निकट अखिल नेपाल किसान महासंघले आइतबार पार्टी केन्द्रीय कार्यालय च्यासलमा आयोजना गरेको एक कार्यक्रममा बोल्दै अध्यक्ष ओलीले पूर्वका विभिन्न जिल्लाहरुमा आफूमाथिको आक्रमण प्रयासमा पूर्वराजा ज्ञानेन्द्र शाह र उनका परिवारको संलग्नता रहेको जिकिर गरेका हुन् । 

'मैले हिजो, अस्ती हामी तेह्रथुम, पाँचथर, इलाम, झापा अनेक ठाउँमा हामीले कार्यक्रम गरेका थियौं । तपाईंहरुले अलिअलि सुन्नु पनि भएको होला । कार्यक्रममा जाँदै गर्दाखरी बीचमा केही गुण्डा प्रवृत्तिका व्यक्तिहरु, अराजनीतिक व्यक्तिहरुले हमला गर्ने, पहिचानको राजनीति भनेर अराजनीतिक क्रियाकलाप गर्ने, त्यस्ता खालको क्रियाकलाप गर्ने, ढुंगामुढा गर्ने, त्यस्ता खालको कुराहरू गरे’ ओलीले भने, ‘यसको संलग्नता विभिन्नतिर देखिएको छ । ज्ञानेन्द शाह र उनको परिवारको संलग्नता देखिएको छ । यो अनेकमार्फत् देखिएको छ । यहाँ भित्र उनीहरुले भित्र भित्र खेलाउने, जसलाई मैले छौडा भन्ने गरेको छु । यो पूर्व दरबारियाहरूले छौडा खेलाएर पनि अलिकति यस्तो खालको काम गरेका छन् ।’ 

साथै अहिले सत्तामा हुने पार्टीका कार्यकर्ताहरू अर्काको नाममा ढुंगा हान्न त्यहाँ गएको दाबी पनि उनको छ । 

‘हाम्राविरुद्ध अश्लील, असभ्य, त्यस्ता खालका गालीगलौज गर्ने कुराहरु यिनका मुखबाट भएको छ । त्यो म आफैंले देखेर, भोगेर आएको छु । हरेक ठाउँमा उनीहरुले निषेध गर्न खोज्ने, बाटो छेक्न खोज्ने, रुख ढालेर छेक्न खोज्ने, काँही ढुंगा हान्ने, काँही भिडन्त गर्न आउने । त्यसप्रकार उनीहरुले अनेक ठाउँमा आक्रमण गरे’ ओलीले भने, ‘त्यो खालको उदण्डता र सरकार मुकदर्शक । ढुंगा हान्दिएन भने बीचमा पुलिस उभिएको छ । अव ढुंगा हान्दियो भने त उसलाई पनि लाग्ने भयो । अरुलाई पनि लाग्ने भो । हामीलाई भन्दा पहिले त पुलिसलाई लाग्ने भयो । उसले रोकेर बसेको छ । अलिक मुकदर्शक । उनीहरुले पेलेका छन । धक्का दिएका छन । पुलिसलाई मुन्टयाइएको छ । धक्क्याइएको छ । धक्कामुक्का आएको छ । तर, चुप लागेर बस्छ । माथिको आदेश छैन ।’