प्रमुख प्रतिपक्ष दल नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले वर्तमान सरकारले केही पनि गर्न नसक्ने दाबी गरेका छन् ।

अन्तर्राष्ट्रिय श्रमिक दिवसको अवसरमा सोमबार काठमाडौंमा आयोजित एक कार्यक्रममा बोल्दै उनले नेपाली जनताले प्राप्त गरेको उपलब्धि विरुद्ध विभिन्न प्रकारका शक्तिहरू सल्बलाउन थाल्दा पनि सरकार गम्भीर नभएको आरोप लगाए । केही गर्न नसक्ने सरकार किन सरकारमा बसिरहेको छ, भनेर अचम्म मान्नुपर्ने अवस्था आएको बताए ।

पूर्वराजा ज्ञानेन्द्र शाहप्रति लक्षित गर्दै ओलीले दुलोबाट मुसाले बिरालो हेरे जसरी अनुकूल परिस्थितिको खोजी गरिरहँदा पनि सरकारले भने निरीहता मात्रै प्रकट गरिरहेको जिकिर गरे । सिंहदरबारको फोहोर काठमाडौं महानगरपालिकाले उठाउँदिन भन्दा सरकारले त्यसको जवाफ दिन नसकेको भन्दै उनले आक्रोश व्यक्त गरे ।

अध्यक्ष ओलीले शहरी विकास मन्त्रालयले सिंहदरबारको फोहोर उठाउने काम ठेक्कामा दिएको तर ठेकदारले काम नगरेको उल्लेख गर्दै सरकार र ठेकदारबीचको सम्बन्धबारे खोजी गर्नुपर्ने अवस्था आएको बताए ।

कार्यक्रममा ओलीले श्रमिकहरुबीच फाटो ल्याउने प्रयास भइरहेको भन्दै त्यसलाई निस्तेज पारेर अघि बढ्न सबै मजदुरहरूलाई एकताबद्ध हुन आह्वान गरे । मजदुरको हक, हित र उनीहरूको जायज माग सम्बोधन गर्न श्रमिकहरू बीचको एकता सबैभन्दा ठूलो रहेको स्मरण गराए ।