नेपाल ब्याडमिन्टन संघमा विवाद बढ्दै गएको छ । लामो समयसम्म वार्षिक साधारणसभा हुन नसकेको संघका असन्तुष्ट तीन जना उपाध्यक्षहरु अध्यक्षविरुद्ध निवेदन बोकेर राष्ट्रिय खेलकुद परिषद् (राखेप) पुगेका हुन् । 
अध्यक्षविरुद्ध उपाध्यक्षत्रय नरेश बहादुर सिंह, विश्वेश श्रेष्ठ र सुभाष श्रेष्ठले सदस्य सचिव टंक घिसिङसमक्ष संयुक्त रुपमा लिखित निवेदन दिएका हुन् । निवेदनमा उनीहरुले अध्यक्षबाट केही कुरा सिफारिस भइ आए कार्यान्वयन नगरिदिन आग्रह गरेका छन् । 

निवेदकहरुका अनुसार संघको निर्वाचन २०७२  जेठ महिनामा भएको भएको थियो । जसअनुसार ४ वर्षे कार्यकाल सकिएर थप ३ वर्ष ११ महिना बितिसकेको भएपनि वार्षिक साधारणसभा राखिएको छैन । बरु कुल ७ वर्ष ११ महिनामा जम्मा ४ पटकमात्रै कार्यसमितिको पूर्ण बैठक राखिएको छ । 

यस्तै हालसम्म लेखा परीक्षण गरिएको वा नगरिएको भन्ने कुरा समेत पदाधिकारीलाई जानकारी नगराइएको निवेदनमा उल्लेख छ । 
संघका सबै निर्णय सचिवालय बैठकबाट गरी पूर्ण बैठकबाट अनुमोदन गराउनुपर्ने व्यवस्था भएपनि कहिल्यै पनि त्यसो हुन नसकेको दाबीसहित निवेदनमा भनिएको छ, ‘यसरी हचुवाको भरमा बलपूर्वक अध्यक्षज्यूले चलाइरहेको भएकाले नेपाल ब्याडमिन्टन संघबाट लिखित रुपमा केही कुरा सिफारिस भई आएमा कार्यान्वयन नगरिदिनुहुनका लागि विनम्र अनुरोध गर्दछौँ ।’

ब्याडमिन्टन संघको इतिहासमा पदाधिकारीहरुबाटै नेतृत्वको कार्यशैलीप्रति असन्तुष्टि पोख्दै यसरी निवेदन गरिएको यो पहिलो घटना भएको बताइएको छ ।