प्रहरीले नक्कली शरणार्थी प्रकरणको अनुसन्धान प्रतिवेदन भोलि (सोमवार) मात्रै बुझाउने भएको छ । 

सरकारी वकिलसँग समन्वय भइरहेकाले आइतवार रातिसम्म काम सकेर सोमवार अनुसन्धान प्रतिवेदन बुझाउने जिल्ला प्रहरी परिसर काठमाडौंका प्रहरी उपरीक्षक सीताराम रिजालले जानकारी दिए ।

उनका अनुसार प्रहरीले सोमवार बिहान १० बजे सरकारी वकिललाई प्रहरीले नक्कली शरणार्थी प्रकरणको अनुसन्धान प्रतिवेदन बुझाउने छ । 

अनुसन्धान प्रतिवेदन पाएपछि सरकारी वकिलको कार्यालयले अभियोग पत्र तयार गरेर जिल्ला अदालतमा मुद्दा पेस गर्नेछ ।

प्रहरीले प्रतिवेदन बुझाउन ढिलाइ गरेपछि सरकारी वकिल कार्यालयले ८ जनाको समिति बनाएर चौबीसै घण्टा काम गर्ने तयारी गरेको छ । समयको चाप र मुद्दाको गाम्भीर्यताका कारण प्रतिवेदन आएपछि चौबीसै घण्टा काम गर्ने तयारी भएको जिल्ला सरकारी वकिल कार्यालय काठमाडौंका प्रमुख अच्युतमणि नेउपानेले बताए ।

नक्कली शरणार्थी प्रकरणमा पूर्वमन्त्रीहरू टोपबहादुर रायमाझी, बालकृष्ण खाँणसहित १६ जना प्रहरी हिरासतमा छन् । थप १७ जना समेत गरी कम्तीमा ३३ जनालाई मुद्दा चलाउनुपर्ने निष्कर्षसहितको प्रतिवेदन बुझाउने प्रहरीको तयारी छ ।