नारायणी अटो बिजनेस प्रालिले ‘सिएट सपी’ नामक सिएट टायरको नयाँ शोरुम शुरू गरेको छ ।​

सिएट इण्डिया अन्तर्गत अन्तर्राष्ट्रिय व्यापारका भाइस प्रेसिडेन्ट सत्य रावले आज ललितपुरको बालकुमारीमा नयाँ शोरुमको शुभारम्भ गरेका हुन् ।

‘सिएट टायरको यस नयाँ शोरुमले नेपाली ग्राहकहरूको बद्लिँदो इच्छा एवं आवश्यकतालाई सर्वोत्कृष्ट ढङ्गले परिपूर्ति गर्ने कुरामा मलाई पूर्ण विश्वास छ’ उनले भने ।

इण्डिया नारायणी अटो बिजनेससँग निरन्तर प्रभावकारी सहकार्य गरी भविष्यमा सिएट ब्राण्डको छविलाई नेपाली बजारमा अझ सुदृढ बनाउन उत्सुक रहेको बताए ।

यस्तैगरी, नारायणी अटो बिजनेसका प्रबन्ध निर्देशक अनुप बरालले सिएट जस्तो गुणस्तरीय टायर ब्राण्डसँग जोडिन पाउँदा  आफूलाई हर्ष एवं गौरवको अनुभूति भएको बताए ।

नयाँ शोरुम नेपाली बजारमा निरन्तर वृद्धि भइरहेको सिएटको मागलाई सम्बोधन गर्न एक कोशेढुङ्गा सावित हुने उनले बताए ।

कार्यक्रममा बोल्दै सिएट, इण्डियाका नेपाल र भुटानका कन्ट्री मेनेजर राजपाल चड्डाले सिएट टायरको गुण एवं विशेषताका बारे प्रस्ट पारेका थिए ।

यस्तै, सिएट टायरका नेपालस्थित आधिकारिक विक्रेता एसटीसीका प्रबन्ध निर्देशक सुरेन्द्रकुमार उप्रेतीले टायर नेपाली ग्राहकको पहिलो रोजाई रहेको बताए । ‘हामी निरन्तर ग्राहकहरूलाई गुणस्तरीय एवं भरोसायोग्य तवरले सेवा प्रदान गर्न प्रतिवद्ध छौं’ उनले भने ।

नँया शोरुमको उद्घाटनको अवसरमा सिएट टायरको मोडेल अनुरूप ५ देखि १५ प्रतिशतसम्म छुट प्रदान गरिने कम्पनीले जनाएको छ ।

अन्य उस्तै खालका टायरभन्दा उत्कृष्ट कार्यक्षमताको लागि सिएटले फाइभ स्टारको मान्यता प्राप्त गरेको छ ।

गाडीहरूको चक्कामा सरल एवं सन्तुलित तवरले प्रयोग गर्न सकिने सिएटमा सुरक्षाका विशेषताहरूले पनि भरिपूर्ण रहेको कम्पनीले जनाएको छ । त्यसैगरी उत्पादनले इन्धनको खपत न्यूनीकरण गर्न पनि सहयोग पुर्‍याउने कम्पनीको विश्वास छ ।