नक्कली शरणार्थी प्रकरणमा पक्राउ परेका प्रतिवादीहरूले तत्कालीन गृहसचिव (हाल अख्तियार दुरुपयोग अनुसन्धान आयोगका प्रमुख) प्रेम राईलाई पैसा नदिएको बयान अदालतसमक्ष दिएका छन् ।

साथै यस विषयमा उनीसँग कुनै किसिमको कुराकानी वा गतिविधि नभएको उनीहरूको बयान छ ।

तत्कालीन गृहमन्त्री रामबहादुर थापा 'बादल' का सुरक्षा सल्लाहकार समेत रहेका प्रतिवादी इन्द्रजीत राईले तत्कालीन गृहसचिव राईलाई पैसा दिनुपर्छ भनेर आफूले कसैलाई नभनेको बयान गरेका छन् ।

'सानु भण्डारीलाई सचिव प्रेमकुमार राईलाई पैसा दिनुपर्दछ भनी मैले भनेकै छैन । यो सम्पूर्णरूपले असत्य हो,' इन्द्रजीतले अदालतसमक्ष बयानमा भनेका छन्, 'प्रेमकुमार राई आफैंमा एक प्रतिष्ठित र इमान्दार सचिवका रूपमा राष्ट्रिय लेभलमा गनिनुभएको व्यक्ति हो । उहाँको विषयमा त्यस्तो कुरा म सोच्न पनि सक्दिनँ ।'

तत्कालीन गृहसचिव राईको नाम गलत मनसायले अन्य प्रतिवादीले मुछेको पनि उनले बताएका छन् ।

'सचिवको गाडीमा विना ड्राइभरको सहमति कसैले कसरी पैसा राखिदिन सक्छ ? पैसा राखिदिएको भए सोको जानकारी ड्राइभरलाई समेत हुनुपर्ने हो । गृहसचिवको कार्यकक्षमा प्रवेश हुनुभन्दा पहिला सीसीटीभी तथा सुरक्षा गार्डको समेत अनुमति भएको हुनुपर्दछ । सो समेत रेकर्डमा चेक होस्,' उनले बयानमा भनेका छन्, 'तसर्थ गृहसचिवको गाडीमा पैसा राखेको र गृहसचिवको कार्यकक्षमा भेटेको भन्ने कुरा काल्पनिक हो । नाम मुछ्नु उहाँको गलत मनसाय हो ।'

त्यसैगरी पक्राउ परेका अर्का प्रतिवादी केशव दुलालले पनि तत्कालीन गृहसचिव राईलाई पैसा नदिएको बयान गरेका छन् ।

तत्कालीन गृहमन्त्री रामबहादुर थापा बादलका छोरा प्रतीक थापालाई पैसा दिएको उनले अदालतसमक्ष स्वीकार गरे पनि तत्कालीन गृहसचिव राईलाई पैसा नदिएको बताएका छन् ।

‘रामबहादुर थापा ‘बादल’, प्रेमकुमार राई, डा. अजय क्रान्ति, राजेश्वर स्थापित, राजेश बज्राचार्य, लीला जिसी र टोपबहादुर रायमाझीलाई म, मेरा आफन्त र कुनै नेपाली नागरिकलाई भुटानी शरणार्थी बनाई अमेरिका पठाइदिनु भनी कुनै रकम दिएको छैन,’ दुलालले अदालतसमक्ष भनेका छन् ।

प्रतिवादीमध्येका सानु भण्डारी, सागर राई, सन्देश शर्मा, टंककुमार गुरुङ, इन्द्रजीत राई, टोपबहादुर रायमाझी, सन्दीप रायमाझी, टेकनारायण पाण्डे, बालकृष्ण खाँण, टेकनाथ रिजाल समेतलाई चिनेको भए पनि कुनै रकम नदिएको उनको बयान छ ।

'सानु भण्डारीको डायरीमा मेरो नाम लेखी उल्लेख भएको रकम सानु भण्डारीमार्फत इन्द्रजीत राईलाई बुझाउन मैले दिएको रकम भन्ने सन्दर्भमा डा. इन्द्रजीत राईलाई दिन भनी दिएको होइन, निज सानु भण्डारीसँग मेरो घर जग्गाको कारोबारका लागि लेनदेन भएको कुरा डायरीमा उल्लेख भएको हो,' दुलाले बयानमा थप भनेका छन्, 'प्रतीक थापाले म र मेरो आफन्तलाई भुटानी शरणार्थी बनाई अमेरिका पठाइदिन्छु भनी नक्सालस्थित निलगिरी थकाली भान्साघरमा बोलाई रु पच्चीस लाख नगदै लिएका हुन् । हामी ठगिएको थाहा पाई पैसा फिर्ता माग्दा उल्टै डर, धाकधम्की दिई हालसम्म पैसा फिर्ता दिएका छैनन्  ।'

नक्कली शरणार्थी प्रकरणमा पक्राउ परेका १८ जना प्रतिवादीहरूको बयान सम्पन्न भएपछि आइतवारदेखि काठमाडौं जिल्ला अदालतमा थुनछेक बहस शुरू भएको छ ।