अर्थमन्त्री डा. प्रकाशशरण महतले बजेट बनाउने क्रममा इमान्दारिताभन्दा बाहिर गएर करका दर हेरफेर नगरेको बताएका छन् ।

मंगलवार बजेट निर्माणका क्रममा असम्बन्धित व्यक्तिलाई संलग्न गराई करका दर हेरफेर गरेको भन्ने विषयमा जवाफ दिँदै उनले यस्तो बताए ।

उनले अर्थमन्त्री भएर अर्थ मन्त्रालयको जिम्मेवारी सम्हालेदेखि इमान्दार भएर काम गरेको बताए । उनले आगामी आर्थिक वर्षको बजेट बनाउन आफूले कुनै पनि प्रभावबाट मुक्त भएर पारदर्शी ढंगबाट काम गरेको दाबी गरे । उनले अर्थ मन्त्रालयका कर्मचारीकै रूपमा रामकृष्ण श्रेष्ठलाई करका दर टाइप गर्न दिएको बताए ।

अर्थमन्त्री श्रेष्ठले ३० वर्षदेखि यही काम गर्दै आएको बताए । श्रेष्ठको विज्ञताको कारण अघिल्लो अर्थमन्त्रीले मन्त्रालयमा नियुक्त गरेको देखिएको बताए । उनले इमान्दारिता कायम राखेकाले स्वार्थ समूहहरू, निजी स्वार्थ भएकाहरू पछि लागेको बताए । 

उनले जिम्मेवारीमा बसेकाहरू सबै असत्य, झूटा र असत्य काम गर्न बसेको भन्ने कुरा हुन नसक्ने बताए । उनले कसैले लेखिदियो, त्यो चाहिँ सत्यमाथि सत्य भयो भन्दै तर्क गरे । उनले जिम्मेवारी लिएर कसम खाएर संसदको रोस्टममा उभिएर जवाफ दिएको भन्दै आफ्नो इमान्दारितामाथि शंका नगर्न आग्रह गरे ।

अर्थमन्त्री डा. महतले करको दर हेरफेरबारे आफूहरूले नै निर्णय गरेको बताए । उनले निर्णय भएको इन्ट्री गर्न भने पूर्व नायब सुब्बा रामकृष्ण श्रेष्ठलाई सहयोगीका रूपमा लिएको स्वीकार गरे । उनले करको दर हेरफेरबारे आफू सहितका आधिकारिक व्यक्तिहरूले निर्णय गरेको दाबी गरे । उनले निर्णय गरिसकेपछि निर्णय प्रक्रियामा बसेका पदाधिकारीको उपस्थिति र निर्देशनमा इन्टर गर्ने काम मात्र भएको बताए ।