रोल्पाको लुंग्री गाउँपालिका वडा नम्बर–५ को एक परिवारले विषालु च्याउ नचिन्दा तीन जनाले ज्यान गुमाएका छन् । कालापोखराका दुर्गाबहादुर गुरुङका ११ वर्षका छोरा सुशील, ६ वर्षका प्रेम र श्रीमती भीमाले जंगली च्याउ खाएर ज्यान गुमाएका हुन् ।

 वैदेशिक रोजगारमा गएका दुर्गाको परिवारलाई जंगली च्याउले रित्ताइदिएको छ । 

प्रेम र सुशील असार २५ गते पशु चौपायलाई ओछ्याउने सोत्तल लिन जंगल गएका थिए । उनीहरूले त्यहीँ च्याउ पनि देखे । टिपेर ल्याएर बेलुका त्यसैको तरकारीको रूपमा पकाएर खाए । बेलुका उनीहरूलाई केही भएन भोलिपल्ट बिहानबाट उनीहरूमा रिंगटा लाग्ने र बान्ता हुने लक्षण देखिन थाल्यो । विगुल माविमा पढने दुई दाजुभाई मध्ये प्रेम २६ गते स्कुल पनि गए । उनले विद्यालयमा बान्ता गरे । बान्तामा च्याउ देखियो । शिक्षकहरूले थाहा पाएपछि परिवारमा अरूलाई पनि समस्या हुन सक्छ भनेर हतार हतार घर ल्याए ।  

 वडा अध्यक्ष रिखबहादुर रोकाले भने, ‘घर आउदा दाइ सुशील र आमा भीमाको अवस्था पनि उस्तै रहेछ । त्यसपछि उनीहरूलाई सुशीचौर स्वास्थ्य चौकीमा लगियो ।’

त्यहाँ उपचार सम्भव नभएपछि बुटवल रिफर गरियो । तर  उपचारको क्रममा प्रेमको असार २८ गते, सुशीलको असार ३० गते र आमा भीमाको आइतबार निधन भएको वडा अध्यक्ष रोकाले बताए । 

विपन्न गुरूङ परिवारको आर्थिक अवस्था सुधार गर्न दुर्गा केही वर्षयता वैदेशिक रोजगारमा गएका थिए ।

उनीहरु तीनै जनाको उपचारका क्रममा बुटवलस्थित लुम्बिनी प्रादेशिक अस्पतालमा मृत्यु भएको जिल्ला प्रहरी कार्यालय, रोल्पाका प्रवक्ता प्रकाश भुसालले जानकारी दिए । 

यसैगरी जंगली च्याउ खाँदा अर्घाखाँचीमा पनि ३ जना बिरामी परेका छन् । शीतगंगा नगरपालिका–३ साहु टोलका विजय भण्डारी, माया भण्डारी र तिलमाया भण्डारी बिरामी परेको इलाका प्रहरी कार्यालय ठाडाका प्रहरी निरीक्षक  होमनाथ रेग्मीले जानकारी दिए ।

उनीहरूलाई प्राथमिक स्वास्थ्य केन्द्र ठाडामा सामान्य उपचारपछि थप उपचारका लागि बुटवल रिफर गरिएको उनले बताए । उनीहरूको अहिले लुम्बिनी प्रादेशिक अस्पतालमा उपचार भइरहेको र अवस्था सामान्य रहेको प्रहरी निरीक्षक रेग्मीले बताए ।