नेपाल समाजवादी पार्टीले आज सोमवारबाट संगठन निर्माण तथा विस्तार अभियान सञ्चालन गरेको छ ।

‘अबको राष्ट्रको संकल्प, समाजवादी विकल्प’ भन्ने नारासहित पुस महिनासम्म चल्ने अभियानको नेसपाका केन्द्रीय पदाधिकारीहरूले सातै प्रदेशमा वृक्षरोपण गरी उद्घाटन गर्ने कार्यक्रम रहेको छ ।

अभियानको कोशी प्रदेशमा उपाध्यक्ष हिसिला यमी, मधेश प्रदेशमा अध्यक्ष महिन्द्रराय यादव, बागमती प्रदेशमा सहअध्यक्ष गंगानारायण श्रेष्ठ, गण्डकी प्रदेशमा अध्यक्ष डा. बाबुराम भट्टराई, लुम्बिनी प्रदेशमा सहअध्यक्ष गोविन्द चौधरी, कर्णाली प्रदेशमा भक्तबहादुर शाह र सुदूरपश्चिम प्रदेशमा उपाध्यक्ष दुर्गा सोबको नेतृत्वमा अभियान सञ्चालन हुनेछ ।

पार्टी अध्यक्ष डा. भट्टराईले गोरखाको पालुङटार नगरपालिका–१ खोप्लाङ ज्योति चौतारामा विभिन्न प्रजातिका वृक्षरोपण गरेर अभियानको शुरूआत गर्नेछन् ।

कोशी प्रदेशमा आत्मनिर्भर अर्थतन्त्रको नारासहित मोरङ र सुनसरी जिल्लामा २०० फलफूलको वृक्षरोपण गरेर अभियानको शुभारम्भ हुने प्रदेश इन्चार्ज भरत दाहालले जानकारी दिए । मधेश प्रदेशमा फूलका विरुवा रोपेर अभियान सञ्चालन गर्ने नेसपा नेता प्रमोद यादवले जानकारी दिए ।

बागमती प्रदेशका १३ जिल्लामा प्रत्येक जिल्लामा १ हजार फलफूलसहित विभिन्न प्रजातिका बोटबिरुवा रोपेर अभियानको शुभारम्भ हुने प्रदेश अध्यक्ष बन्दना सुवेदीले जानकारी दिइन् । सुदूरपश्चिम प्रदेशका कैलाली जिल्लाको टिकापुर, भजनीमा व्यापक रूपमा वृक्षरोपण गरेर अभियानको शुभारम्भ हुने इन्चार्ज जनक शाहले जानकारी दिए । प्रदेशका कञ्चनपुर, बैतडी, डडेलधुरा, अछाम, बाजुरा, बझाङका विभिन्न स्थानमा समेत वृक्षरोपण गरी अभियानको शुभारम्भ हुने शाहले जानकारी दिए ।

प्रत्येक जिल्लामा विभिन्न प्रजातिका १ हजारभन्दा बढी वृक्षरोपण गरिने लक्ष्य लिइएको नेसपाले जनाएको छ । अभियान ७ वटा प्रदेशका सबै जिल्ला तथा केही आवश्यकता अनुसार पालिका तहमा समेत सञ्चालन गरिने कार्यक्रम रहेको नेसपाले जनाएको छ ।