मधुसूदन भट्टराईको निर्देशनमा निर्माण भइरहेको फिल्म ‘हामी तीन भाई’को छायांकन ८० प्रतिशत सकिएको छ ।

निर्देशक भट्टराईले फिल्मको बाँकी २० प्रतिशत छायांकन काठमाडौंमा गरिने जानकारी दिए । फिल्मको अधिकांश छायांकन मकवानपुरको चित्लाङमा गरिएको छ । काठमाडौंमा एक गीत र केही सिनको मात्रै छायांकन गरिने निर्देशक भट्टराईले बताए । 

साजित महत प्रस्तुतकर्ता रहेको ‘हामी तीन भाई’मा विनोद न्यौपाने, लक्ष्मी बर्देवा, कुशल बिष्ट, आश्मा गिरी, जाहान्वी बस्नेत, फलित राई, राजाराम पौडेल, रवीन्द्र झा, विष्णु सापकोटा (हर्के हवल्दार), यादव देवकोटा (सरापे), लगायतको अभिनय छ । 

निर्देशक भट्टराईको कथा रहेको फिल्मको पटकथा तथा संवाद शिवम् अधिकारीले लेखेका हुन् ।