दशैंको अवसर पारेर प्रदर्शनमा आएका नेपाली फिल्मले हलमा दर्शकको साथ पाए । असोज २६ गतेबाट प्रदर्शनमा आएको ‘परदेशी २’ र कात्तिक ४ गतेबाट प्रदर्शनमा आएको ‘पशुपति प्रसाद २ : भस्मे डन’ अहिले पनि दर्शकको बाक्लो उपस्थितिका साथ प्रदर्शनरत छन् । 

दुवै फिल्मले राम्रो व्यापार गरेका छन् । ​

दशैंमा हलमा नेपाली फिल्मले दर्शक पाउँदा युट्युबमा सार्वजनिक गरिएका फिल्म हेर्ने दर्शकहरू पनि उल्लेख्य देखिएका छन् । 

दशैं​​को छेकोमा युट्युबमा आधा दर्जनको हाराहारीमा नेपाली फिल्म सार्वजनिक भएका थिए । ति सबै फिल्मले युट्युबमा छोटो समयमै लाखौं भ्युज पाएका छन् । 

झन्डै एक महिना अगाडि सार्वजनिक फिल्म ‘दुई नम्बरी’लाई आइतवारसम्म युट्युबमा ८८ लाख हाराहारीले हेरिसकेका छन् । यो फिल्ममा दयाहाङ राई, सौगात मल्ल, उपासना सिंह ठकुरीलगायतको अभिनय छ । 

त्यस्तै, एक साताअघि युट्युबमा सार्वजनिक फिल्म ‘फूलवारी’ले ४६ लाख बढी भ्युज पाइसकेको छ । युट्युबमा ट्रेन्डिङको​ पहिलो नम्बरमा रहेको यो फिल्ममा विपिन कार्की, दयाहाङ राई, अरुणा कार्की, प्रियंका कार्की, शिल्पा मास्केलगायतका कलाकारहरूको अभिनय छ । 

दुई साताअघि सार्वजनिक फिल्म ‘बाबरी’ले ४० लाख बढी भ्युज पाएको छ । धिरज मगर, अदिति बुढाथोकी, धिरज नाडकरलगायतका कलाकारहरूको यसमा शीर्ष भूमिका छ । 

‘२.० छड्के’, ‘रोमियो एण्ड मुना’ जस्ता दशैंको माहोलमा युट्युबमा सार्वजनिक नेपाली फिल्मले पनि राम्रो भ्युज पाएका छन् ।