संक्रमणकालीन न्यायबारे राष्ट्रसंघको चासो, ओलीले देखाए प्रधानमन्त्री

‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
संक्रमणकालीन न्यायसम्बन्धी विषय टुंग्याउन सकस भइरहेका बेला संयुक्त राष्ट्रसंघले यसबारे चासो देखाएको छ । संयुक्त राष्ट्रसंघका महासचिव एन्टोनियो गुटेरेसले नेपालको संक्रमणकालीन न्याय प्रक्रियामा चासो राख्दै सघाउन तयार रहेको बताएका हुन् । यद्यपि नेपाल भ्रमणमा रहेका उनले अन्तर्राष्ट्रिय मापदण्ड, सर्वोच्च अदालतको आदेश र पीडित मैत्री हुनुपर्ने सर्त अघि सारेका छन् । 

आइतबार प्रधानमन्त्री पुष्पकमल दाहाल प्रचण्डसँग सिंहदरबारमा भेटवार्तापछि आयोजित  संयुक्त पत्रकार सम्मेलनमा उनले भने, ‘संक्रमणकालीन न्यायले पीडित, उनीहरुको परिवार र समुदायमा शान्ति ल्याउनुुपर्छ ।’ 
००००
तर, प्रमुख प्रतिपक्ष दल नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले प्रधानमन्त्री पुष्पकमल दाहाल प्रचण्डका कारण शान्ति प्रक्रियालाई टुंगोमा पुर्‍याउन असहज भएको दाबी गरेका छन् । 
आइतवार संयुक्त राष्ट्र संघका महासचिव एन्टोनियो गुटेरेससँगको भेटमा उनेले यस्तो बताएका हुन् । उनले संक्रमणकालीन न्यायको विषय पीडितहरूलाई ध्यान राखेर समाधान गरिनुपर्ने समेत बताए । 

‘हामी त्यसलाई छिटो भन्दा छिटो टुंग्याउन चाहन्छौँ । तर, प्रधानमन्त्रीज्यू जो हिजोको विद्रोही नेता हुनुहुन्थ्यो । आज प्रधानमन्त्री हुनुहुन्छ । उहाँले नै यी सबै विषयहरू टुंग्याउन भूमिका खेल्नुपर्नेमा चाहिँ अलिकति हिंसालाई बढावा दिने खालको, हिंसालाई महिमा मण्डन गर्ने खालको उहाँका क्रियाकलापले अलिकति असहज जस्तो भएको छ’, ओलीको भनाइ उदृत गर्दै एमाले सचिव प्रदीप ज्ञवालीले भने, ‘खास गरेर युद्ध सुरु भएको दिनलाई दिवसको रूपमा मान्यता दिने जुन कुराहरू भयो । यसले पीडितहरू अलिकति चिन्तामा छन् । हामीले चाहिँ शान्ति प्रक्रिया टुंग्याउँदाखेरी गम्भीर अपराधमा आम माफी हुन नहुने, यसमा हाम्रा अन्तर्राष्ट्रिय कमिटमेन्टहरूलाई पनि ध्यान दिनुपर्ने, सर्वोच्च अदालतको जुन आदेश छ, त्यो कुरालाई समेत ध्यानमा राखेर त्यो विषय छिटो भन्दा छिटो टुंगियोस् भन्ने चाहन्छौँ ।’
००००
यसैगरी महासचिवसँगको भेटमा पूर्वप्रधानमन्त्री तथा कांग्रेस सभापति शेरबहादुर देउवाले सङ्क्रमणकालीन न्यायसँग सम्बन्धित विधेयक संसद्बाटै छिट्टै पारित गर्ने बताए ।
००००
राष्ट्रपति रामचन्द्र पौडेलले जलवायु परिवर्तनको कारक नभएर पनि नेपालले भोग्नुपरेको नकारात्मक परिणामबारे गम्भीर बन्न संयुक्त राष्ट्रसंघलाई आग्रह गरेका छन् ।

जलवायु परिवर्तनको असर न्यूनीकरणका लागि परिवर्तनको कारक बनेका विकसित मुलुकहरूलाई दायित्व पूरा गर्न राष्ट्रसंघले पहलकदमी लिनुपर्ने उनको भनाइ थियो । 

नेपालको औपचारिक भ्रमणमा रहेका संयुक्त राष्ट्रसंघका महासचिव गुटेरेससँगको भेटमा राष्ट्रपति पौडेलले यस्तो आग्रह गरेका हुन् । आइतवार शीतल निवासमा भएको शिष्टाचार भेटमा उनले सो आग्रह गरेका राष्ट्रपतिका प्रेस सल्लाहकार किरण पोखरेलले जानकारी दिए । महासचिवले आइतबार राष्ट्रपतिदेखि विभिन्न दलका नेतालाई भेटेका छन् भने सोमबार सगरमाथा क्षेत्र र पोखराको भ्रमण गर्ने कार्यतालिका छ । उनले मंगलबार संघीय संसदलाई सम्बोधन गर्ने कार्यक्रम छ ।  
००००
हमासको आक्रमणबाट इजरायलमा मृत्यु भएका थप ३ नेपाली विद्यार्थीको शवको पहिचान खुलेको छ ।
पदम थापा, प्रवेश भट्टराई र राजन पराजुलीको शवको पहिचान भएसँगै हालसम्म ८ विद्यार्थीको शवको पहिचान खुलेको इजरायलस्थित नेपाली राजदूतावासले जनाएको छ ।
००००
परराष्ट्रमन्त्री एनपी साउद आइतबार अमेरिका प्रस्थान गरेका छन्। 
भ्रमणका क्रममा उनले सोमबार वाशिङ्टन डिसीमा अमेरिकी विदेशमन्त्री एन्टोनी जे ब्लिन्केनसँग द्विपक्षीय भेटवार्ता गर्ने कार्यक्रम रहेको परराष्ट्र मन्त्रालयले जनाएको छ ।  
००००
कोशी प्रदेशका मुख्यमन्त्री केदार कार्कीले सबै राजनीतिक दलको सहमतिमा मन्त्रिपरिषद् विस्तार हुने बताएका छन् । सहमतीय सरकार सञ्चालनको प्रयास गर्दा मन्त्रिपरिषद् विस्तारमा ढिलाइ भएको उनले बताए ।

झापाको विर्तामोडमा अन्तर्राष्ट्रिय झापाली समाजको चौथो महाधिवेशनमा मुख्यमन्त्री कार्कीले कोशी प्रदेशमा सहमतीय मन्त्रिपरिषद् विस्तार हुने स्पष्ट गरे ।
००००
गैरआवासीय नेपाली संघ (एनआरएनए)को  आरके शर्मा समूहले संघको नाममा रहेका विभिन्न बैंकको खाता रोक्काका लागि निवेदन दिएको छ । 
११ औँ महाधिवेशनअघि कोषाध्यक्षको भूमिकामा रहेका लोक दाहाल र सुनिल साहमार्फत शर्माले विभिन्न बैंकमा रहेका १८ वटा खाता बन्द गर्न निवेदन दिएका हुन् ।
००००
नेकपा (माओवादी  केन्द्र)को अभियान एक महिना थपिएको छ । आइतबार बिहान बसेको पार्टी पदाधिकारी बैठकले तीनमहिने पार्टी रूपान्तरण अभियान  एक  महिना  लम्ब्याउने निर्णय गरेको हो ।
००००
चालू आर्थिक वर्षको तेस्रो महिनासम्ममा मुलुकले रु चार खर्ब सात अर्ब ७५ करोड ८९ लाख बराबरको माल वस्तुको आयात गरेको छ ।
गत आर्थिक वर्षको सोही अवधिमा रु चार खर्ब ९९ करोड बराबरको वस्तु आयात भएको छ । गत आवको तेस्रो महिनाको तुलनामा चालू आवको तेस्रो महिनासम्म कुल आयात एक दशमलव ६९ प्रतिशतले बढेको छ ।
००००
नेपाल स्टक एक्सचेञ्ज (नेप्से) परिसूचक दोहोरो अङ्कले घटेको छ ।
आइतवार नेप्से परिसूचक २८ दशमलव १८ अङ्कले ओरालो लागेर १ हजार ८ सय ७५ दशमलव ६५ मा सीमित भएको छ ।
००००
लेबनानमा तैनाथ संयुक्त राष्ट्रसङ्घीय अन्तरिम फौजअन्तर्गत खटिएका एक नेपाली शान्ति सैनिक घाइते भएका छन् । त्यहाँस्थित नेपाली सैनिक रहेको संयुक्त राष्ट्रसङ्घीय पोष्ट ८–३३ नजिक सम्भावित इजरायली डिफेन्स फोर्स र हिजबुल्ला समूहबीचको आर्टिलरी–रकेटमोर्टार प्रहारका क्रममा यही कात्तिक ११ गते राति ती हतियारको सेल खसेर उनी घाइते भएको सैनिक जनसम्पर्क तथा सूचना निर्देशनालयले जनाएको छ ।