वर्षमा एक सय हाराहारी नेपाली चलचित्र प्रदर्शनमा आउँदा धेरैले पोस्टरको खर्च पनि उठाउन सक्दैनन् । 

लगानी उठाउने र नाफामा जाने सौभाग्य एकाधले मात्र पाउँछन् । त्यसमा प्रायः चाडपर्व र बिदाको समयमा प्रदर्शनमा आउने चलचित्र पर्छन् । 

र, त्यसमा पनि चलचित्रका लागि प्रायः दशैं बढी फाप्ने गर्छ । लामो बिदा र उत्सवको माहोलले चलचित्रको व्यवसायलाई सघाउने गरेको छ । यसवर्ष पनि नेपाली चलचित्रलाई दशैं फापेको छ । 

दशैंको अवसर पारेर प्रदर्शनमा आएका ‘परदेशी २’ र ‘पशुपति प्रसाद २ः भस्मे डन’ दुवैले राम्रो व्यापार गरेका छन् । नारायण रायमाझी निर्देशित चलचित्र ‘परदेशी २’ तेस्रो सातामा पनि राम्रो शोका साथ प्रदर्शन भइरहेको छ । 

शुरूआती दिनबाटै पश्चिमका हलमा दर्शकको भीडभाड रहे पनि काठमाडौं र पूर्वका हलमा चलचित्र औसत चलेको थियो । 

विस्तारै राजधानी र पूर्वका हलमा पनि पिकअप लिँदै चलचित्र तेस्रो सातामा प्रदर्शन भइरहेको निर्माता राजेश वंशल बताउँछन् । सोमवारसम्म आउँदा चलचित्रले ७ करोडमाथिको व्यापार गरेको उनले दाबी गरे ।

‘सबै ठाउँबाट कलेक्सनको रिपोर्ट लिन पाएका छैनौं, सबै आउँदा हाम्रो अनुमानभन्दा बढी पनि हुन सक्छ’, निर्माता वंशलले भने । 

‘परदेशी २’ प्रकाश सपूतको डेब्यू चलचित्र हो । चलचित्रमा उनीसँगै केकी अधिकारी, वर्षा शिवाकोटी, प्रशान्त तामाङ, दिलिप रायमाझी, रमा थपलियालगायतको अभिनय छ । 

फूलपातीको दिनबाट प्रदर्शनमा आएको दीपेन्द्र के. खनाल निर्देशित ‘पशुपति प्रसाद २ः भस्मे डन’ले पनि राम्रो व्यापार गरेको छ । 

विपिन कार्की, सौगात मल्ल, स्वस्तिमा खड्कालगायतको अभिनय रहेको चलचित्रले पहिलो दिन दुई करोड ४० लाख ग्रस कलेक्सन गरेको निर्माण पक्षको दाबी थियो । त्यसपछिको कलेक्सन रिपोर्ट भने सार्वजनिक गरिएको छैन । निर्माण टीमका सदस्यका अनुसार दोस्रो साताको सोमवारसम्म यो चलचित्रको कलेक्सन पनि ७ करोडमाथि छ । 

यस चलचित्रको निर्माण पक्षले ‘कबड्डी’ले बनाएको सर्वाधिक कलेक्सनको रेकर्ड तोड्ने अपेक्षा गरेको थियो । यद्यपि, अहिलेसम्मको अवस्था हेर्दा निर्माण टीमले अपेक्षा गरेभन्दा चलचित्रको कलेक्सन धेरै कम हुन पुगेको छ । 

निर्देशक दीपेन्द्र के. खनाल पनि चलचित्रले अपेक्षा गरेअनुसारको कमाइ गर्न नसकेको स्वीकार्छन् । 

‘हाम्रो चलचित्रको जुन हाइप थियो, जति मेहनत गरेका थियौं, त्यो अनुसार कमाइ हुन सकेन,’ खनालले लोकान्तरसँग भने, ‘चलचित्रले नाफा कमायो । सुपरहिट भयो । तर, कमाइका हिसाबले हामी खिन्न भयौं ।’ 

चलचित्रले प्रदर्शनअगावै विदेश राइट्सबाट लगानी सुरक्षित गरे पनि नेपाली हलमा अपेक्षाअनुसारको व्यापार गर्न नसकेको हो । 

यस साता पनि नयाँ नेपाली चलचित्र प्रदर्शनमा नभएकाले ‘परदेशी २’ र पशुपति प्रसाद २ः भस्मे डन’को प्रदर्शन लम्बिने देखिएको छ । 

तिहार पनि फाप्ने विश्वास

अब, चलचित्रकर्मी र दर्शकको ध्यान तिहारमा केन्द्रित छ । तिहारको अवसर पारेर कात्तिक २४ गतेबाट नेपाली चलचित्र ‘दिमाग खराब’ प्रदर्शनमा आउँदैछ । 

‘लुट’जस्तो हिट चलचित्र दिएका निश्चल बस्नेतको कमब्याक चलचित्र भएका कारण ‘दिमाग खराब’लाई प्रतिक्षित मानिएको हो । 

यो चलचित्रमा दयाहाङ राई, खगेन्द्र लामिछाने, अर्पण थापा, स्वस्तिमा खड्का लगायतका कलाकारहरूको अभिनय छ ।

सामाजिक तथा राजनीतिक कथामा चलचित्र निर्माण गरिएको छ । निश्चलको कमब्याक र चलेका कलाकारहरूको अभिनयका कारण चलचित्रले राम्रो कमाइ गर्ने विश्वास लिइएको छ ।