आशुतोष ध्वज कार्कीको लेखन तथा निर्देशनमा बनेको फिल्म ‘जम्प’को प्रदर्शन मिति तय गरिएको छ । हाल पोस्ट प्रोडक्सनको अन्तिम चरणमा रहेको फिल्म मंसिर २९ गतेबाट प्रदर्शनमा आउने भएको हो । 

नयाँ र जोश बोकेको टिम मिलेर निर्माण गरिएको फिल्म साइकोलोजिकल थ्रिलर जनरामा बनेको छ । राष्ट्रिय धावक बनेका मुख्यपात्रलाई समय परिवर्तन गर्ने अलौकिक क्षमता प्राप्त हुन्छ । आफ्नो विगतका दबाएर राखिएका अनुभूतिहरूले उसलाई पिरोल्न थाल्छन् । यससँगै आएका ट्विस्टहरू र भ्रष्टाचारको जालो वरपर यो फिल्म रुमलिने निर्देशक कार्कीले बताए । 

क्रियटिभ माकुरा मिडियाको ब्यानरमा फिल्म बनेको हो । 

इशा खड्का कार्यकारी निर्माता रहेको फिल्मले नेपाली फिल्ममा नयाँ लहरको उत्प्रेरकको रुपमा काम गर्दै रचनात्मक कथा कथन र नवीनताको पुनर्जागरण गर्ने टिमको विश्वास छ । 

फिल्ममा सरोज श्रेष्ठ, सन्देश शाक्य, बिनिता थापा मगर, मन्जिल जिसी, सगुन तामाङ, रोशनी स्याङ्ग्बो, शंकर महर्जन र प्रवल कंडेलको मुख्य भूमिका छ । विदेशी फिल्म फेस्टिभलमा आफ्नो दरिलो उपस्थिति जनाइसकेको ‘जम्प’ले नेपाली दर्शकलाई छुट्टै स्वाद दिने विश्वास रहेको लेखक तथा निर्देशक कार्कीले बताए । 

क्रिएटिभ माकुरा टिममा आशुतोष ध्वज कार्की, प्रसन थापा, देबेश राजकर्णिकार, अंकित सिंह, एन्जेलिका खत्री, निरोज महर्जन, विपिन कपाली, अरिश राजकर्णिकार, सम्राट खनाल र सुरज कटुवाल रहेका छन् । यो टिमले दर्शकलाई पूर्ण मनोरञ्जन दिने विश्वासका साथ फिल्म ‘जम्प’को प्रचार प्रसार पनि थालनी गरेका छन् । फिल्मलाई गोविन्द शाहीले वितरणको जिम्मा लिएका छन् ।