शुक्रबारको शक्तिशाली भूकम्पपछि सोमबार फेरि आएको अर्को झट्काले थप १३ जना घाइते भएका छन् । गृह मन्त्रालयले ५.८ म्याग्निच्युडको सोमबारको परकम्पनबाट रुकुम पश्चिममा ११ र जाजरकोटमा २ जना घाइते भएको जनाएको छ । सोमबार दिउँसोको परकम्पको केन्द्रबिन्दु पनि जाजरकोट नै रहेको राष्ट्रिय भूकम्प मापन केन्द्रले जनाएको छ । 

गृह मन्त्रालयका प्रवक्ता नारायण प्रसाद भट्टराईले जारी गरेको विज्ञप्तिमा शुक्रबार जाजरकोटको बारेकोट केन्द्रबिन्दु भई गएको भूकम्पबाट हालसम्म १५३ जनाको मृत्यु भएको उल्लेख छ। यस पूर्व सो घटनाबाट मृत्यु भएको सङ्ख्या १५७ उल्लेख भएकोमा ४ जनाको दोहोरो विवरण परेकोले सो सङ्ख्या हटाइएको उनले बताए। 

सो घटनामा घाइते भएका ३७५ जनामध्ये रुकुम पश्चिममा ५, जाजरकोटमा ३, बाँकेमा ४२, सुर्खेतमा १७ र काठमाडौँमा ९ गरी कुल ७६ जना उपचाररत छन् । यस्तै बाँकी २९९ जना घाइतेहरू भने उपचारपश्चात् घर फर्किएको मन्त्रालयले जनाएको छ ।  

मन्त्रालयले क्षतिको विवरण मूल्याङ्कनका लागि  टोली गाउँ गाउँमा खटाइए‌को भन्दै यसबारे यकिन विवरण प्राप्त हुने क्रम जारी रहेको जनाएको छ । 

 हाल स्थानीय जनप्रतिनिधि तथा सुरक्षा निकायबाट सङ्कलन भएको प्रारम्भिक तथ्याङ्कका आधारमा राहत सामाग्री वितरण भइरहेको मन्त्रालयले जनाएको छ। 

मन्त्रालयका अनुसार हालसम्म राहत कार्यमा गृह मन्त्रालयको नेतृत्वमा विभिन्न सङ्घसंस्थाबाट जाजरकोट जिल्लामा ब्ल्याङ्केट ३ हजार ६५५ थान, कपडा १,५०० थान, डसना ३५ थान, सिरक ५४ थान, तन्ना ४२० थान, बेबी प्याक १०० बटा, होम टेन्ट ४७ थान, त्रिपाल ३ हजार ४०९ थान वितरण भएको छ । 

यसैगरी म्याट्रेस ५३६ थान, स्लिपिङ ब्याग ६२ थान, पि.फम ५० रोल, बाल्टिन ६६७ थान, सोलार १५३ थान, पानी शुद्धीकरणका लागि पीयूष २७४ वटा, घुम्ती शौचालय ५० वटा, हाइजिन किट २८४ थान र चामल ३० हजार ५५० केजी, दाल ७९९ केजी, खाने तेल २६२ कार्टुन, चिउरा १०२ बोरा लगायतका विभिन्न प्रकारका सामाग्रीहरू वितरण भइसकेको छ।

 त्यसैगरी रुकुम पश्चिम जिल्लामा टेन्ट १० थान, त्रिपाल १,००७ थान, म्याट ६०० थान, कम्बल १,००० थान, कपडा १५० थान, पि.फम २२ रोल, बाल्टिन २६७ थान, तन्ना २०० बान, ब्ल्यांकेट ३०० थान, चामल ६,४०० केजी, दाल १ हजार १४० केजी, तेल ३४० लिटर र पानी शुद्धीकरणका लागि पीयूष २६७ वान लगायतका विभिन्न प्रकारका सामाग्रीहरू वितरण भएको मन्त्रालयले जनाएको छ । 

हालसम्म त्रिपाल ८,३२० थान, स्लिपिङ ब्याग १ हजार ३४५ थान, टेन्ट ३५० थान, ब्ल्यांकेट ९० थान लगायतका गैरखाद्य सामाग्री जिल्लामा पठाइसकिएको मन्त्रालयले जनाएको छ । 

विभिन्न सङ्घसंस्थाबाट प्राप्त सहयोग समेत गरी हालसम्म  दुई जिल्लामा पठाइएका गैरखाद्य सामाग्री त्रिपाल १२,६८४ थान, टेन्ट ८४९ थान, ब्ल्यांकेट ७,६८५ थान, स्लिपिङ ब्याग ३ जहार २१२ थान, म्याट्रेस २,४१५ थान, पि.कम ७२ रोल लगायतका सामाग्री पठाइएको पनि मन्त्रालयको भनाइ छ । 

यसैगरी राहत वितरणका भारतबाट प्राप्त सामग्री पनि प्रभावित स्थलतर्फ पठाइसकिएको छ। यसैगरी उपप्रधानमन्त्री एवं गृहमन्त्री नारायणकाजी श्रेष्ठको अध्यक्षतामा बसेको बैठकको निर्णयअनुसार ५–५ करोड रुपैयाँ समेत जिल्ला विपद् व्यवस्थापन कोषमा निकासा भइसकेको मन्त्रालयले जनाएको छ । 

राहत वितरणका लागि कर्णाली प्रदेश सरकार, काठमाडौँ महानगरपालिका, शान्ति नेपाल, द्वारिकाज फाउन्डेसन, मारवाडी सेवा समिति, प्रदेश उद्योग वाणिज्य सङ्घ कर्णाली प्रदेश, नेपाल रेडक्रस सोसाइटी, युनिसेफ, विश्व खाद्य कार्यक्रम, जिल्ला प्रशासन कार्यालय, रुपन्देही, दाङ र बाँकेको संयोजनमा विभिन्न स्थानीय तहलगायतका  दाताहरूबाट प्राप्त खाद्य तथा गैरखाद्य सामाग्री उल्लिखित दुई जिल्लामा पठाइएको समेत भट्टराईले जानकारी दिए । सरकारले सबै सहयोगी दाताहरूलाई धन्यवाद व्यक्त गरेको छ ।