पछिल्लो समय हलमा नेपाली चलचित्रको खडेरी देखिए पनि घोषणा भने धमाधम भइरहेका छन् । अहिले घोषणा गरिएका चलचित्रमध्ये कुनै लगत्तै छायांकनमा जाने तयारीमा छन् । कुनै भने एक वर्षपछि छायांकन गर्ने योजनाका साथ अहिले घोषणा गरिएको छ । 

भदौंमा प्रदर्शनमा आएको ‘नाङ्गो गाउँ’ हलमा चलिरहेकै समयमा निर्माण पक्षले ‘नाङ्गो गाउँ २’ निर्माणको घोषणा गरेको थियो । चलचित्रले राम्रो व्यापार गरेपछि यसका निर्माता हिमाल कड्रिया र निर्देशक दीपेन्द्र लामाले दोस्रो श्रृङ्खला निर्माणको घोषणा गरेका थिए । लामाकै लेखन एवं निर्देशनमा निर्माण हुने चलचित्रको कथा ‘नाङ्गो गाउँ’ जहाँबाट सकिएको थियो, त्यहीबाट सुरु हुने जनाइएको छ । जसअनुसार चलचित्रमा ‘नाङ्गो गाउँ’कै मुख्य कलाकार अभिनेता दयाहाङ राई र शिशिर वाङ्देलको शीर्ष भूमिका रहने बुझन् सकिन्छ । चलचित्रको घोषणा अहिले गरिए पनि छायांकन भने अर्को वर्ष मात्र हुने लेखक एवं निर्देशक लामाले बताएका छन् । 

यसपछि ‘नाङ्गो गाउँ’का निर्माता एवं निर्देशकले अर्को एक चलचित्र पनि घोषणा गरिसकेका छन् । दीपेन्द्र लामाको लेखन एवं निर्देशन, हिमाल कड्रियाको निर्माण रहने उक्त चलचित्रको नाम ‘दुखी आत्मा’ राखिएको छ । 

चलचित्रको शीर्ष भूमिकामा अभिनेता दयाहाङ राई अनुबन्धित भइसकेका छन् । अहिले पटकथा लेखन कार्य अन्तिम चरणमा पुगेको बताउँदै लेखक एवं निर्देशक लामाले चलचित्रको छायाँकन कहिले सुरु हुन्छ भन्ने तय नभएको बताए । 

‘प्रेम गीत’ फ्रेम्ड निर्माता सन्तोष सेनले चलचित्र ‘बलिदान’ निर्माणको घोषणा गरेर पोष्टर र टिजरसमेत सार्वजनिक गरिसकेका छन् । सन्तोष स्वयंमको निर्देशन रहने चलचित्रले अर्को दशैंलाई प्रदर्शन गर्ने मितिसमेत घोषणा भइसकेको छ । 

महंगो बजेटमा निर्माण हुन लागेको भनिएको चलचित्रमा अभिनेता अर्पण थापा र सौगात मल्ल अनुबन्धित भइसकेका छन् । पवन विष्ट निर्माता रहने चलचित्रको कार्यकारी निर्मातामा चक्रबहादुर चन्द र प्रेम पुरी रहनेछन् । तिहारपछि छायांकन सुरु हुने भनिए पनि चलचित्रको छायांकन मंसिरको तेस्रो सातासम्म सुरु भएको छैन । छायांकन सुरु हुन अझै एक महिनाभन्दा बढी समय लाग्ने निर्देशक सेनले लोकान्तरलाई जानकारी दिए । 

यसवर्ष कात्तिकको ४ गतेबाट प्रदर्शनमा आएको ‘पशुपति प्रसाद २ः भस्मे डन’ चलिरहेकै समयमा यसको तेस्रो श्रृङखला ‘पशुपति प्रसाद ३’ निर्माणको घोषणा गरिएको थियो । दोस्रो श्रृङखलाले राम्रो कमाइ गरेपछि तेस्रो श्रृङखलाको घोषणा गरिएको थियो । खगेन्द्र लामिछानेको कथा रहने तेस्रो श्रृङखलालाई दीपेन्द्र के. खनालले नै निर्देशन गर्नेछन् । निर्माताका रूपमा रोजिना सिटौला रहनेछिन् । मुख्य भूमिकामा खगेन्द्र लामिछाने, वर्षा शिवाकोटी, विपीन कार्कीलगायत कलाकार रहनेछन् । ‘पशुपति प्रसाद’ र ‘पशुपति प्रसाद २ : भस्मे डन’का अपूरा र छाडिएका पात्रहरूको कथा तेस्रो श्रृङ्खलामा समावेश गरिने जनाइएको छ । चलचित्रको छायांकन कहिलेबाट सुरु हुने निर्माण टिमले तय गरिसकेको छैन । यता, दीपेन्द्र के. खनालले ‘मेयर’ नामक चलचित्र बनाउने घोषणासमेत गरिसकेका छन् ।

निर्देशक दीनेश राउतले चलचित्र ‘पूजार सार्की’ निर्माणको घोषणा गरेका छन् । विकास सुवेदीको लेखन, सुभाष भुसाल निर्माता रहने चलचित्रमा अभिनेताद्धय आर्यन सिग्देल र प्रदीप खड्का अनुबन्धित भइसकेका छन् । दुई चलेका अभिनेताहरूको सहकार्य लिएर चलचित्र वृत्तमा चासोका रूपमा हेरिएको छ । चलचित्रको छायांकन माघको पहिलो साताबाट सुरु गरिने निर्देशक राउतले जानकारी दिए । राउत यतिबेला अन्य चलचित्रको समेत तयारीमा छन् ।  

निर्देशक परिच्छेद सेनले ‘महाराजधिराज’ नामक चलचित्र निर्माणको घोषणा गरेका छन् । २०८१ सालको तिहारलाई रिलिज मिति तय गर्दै निर्माण घोषणा गरिएको चलचित्रको छायांकन भने सुरु भएको छैन । 

‘लाखे’ चलचित्रका निर्देशक सम्राट बस्नेतले सस्पेन्स, थ्रिलर र कमेडी जनरामा ‘कंगारु’ नामक चलचित्र निर्माणको घोषणा गरेका छन् । राजीव गुरुङ (दीपक मनाङे)को प्रस्तुतिमा बन्ने चलचित्रमा केही दिनअघि मात्रै अभिनेता केदार घिमिरेलाई अनुबन्धित गरिएको छ । यो चलचित्रको छायांकन फागुनबाट सुरु हुने जनाइएको छ । 

सुरेन्द्र पौडेलको निर्देशनमा चलचित्र ‘वरिष्ठ बलराम’ निर्माणको घोषणा गत कात्तिक पहिलो साता भएको थियो । दयाहाङ राई, खगेन्द्र लामिछाने, दिव्या रायमाझीको शीर्ष भूमिका रहने चलचित्रको छायांकन मंसिर १५ बाट सुरु हुने भनिए पनि सुरु भइसकेको छैन । यो चलचित्रको छायांकन सुरु हुन केही समय लाग्ने बुझिएको छ । 

एक्सन स्टार बिराज भट्टले आफ्नै निर्माण तथा निर्देशनमा ‘१२ गाउँ’ नामक चलचित्र निर्माणको घोषणा गरेका छन् । अघिल्लो साता चलचित्रको टाइटल लोगो सार्वजनिक गर्दै उनले विराट भट्ट प्रोडक्सनको ब्यानरमा चलचित्र बन्न लागेको जानकारी दिएका थिए । चलचित्र एक्सन–थ्रिलर जनरामा निर्माण हुने उनले बताएका छन् । कलाकार को को हुने र छायांकन कहिलेदेखि सुरु हुने उनले केही खुलाएका छैनन् । 

यस्तै, दयाहाङ राई र रिश्मा गुरुङलाई लिएर चलचित्र ‘रिमै’ निर्माणको घोषणा केही दिनअघि मात्रै गरिएको थियो । सोसल–रोमान्टिक जनरामा निर्माण हुन लागेको चलचित्रलाई ‘मन्त्र’ फेम्ड निर्देशक खिलबहादुर गुरुङले निर्देशन गर्दैछन् । उपेन्द्र सुब्बाको पटकथा लेखन रहने चलचित्रको छायाँकन चैतबाट सुरु हुने निर्देशक गुरुङले जानकारी दिए । चलचित्रको प्रदर्शन मितिसमेत घोषणा भइसकेको छ । आगामी वर्ष तीजको अवसर पारेर भदौं २१ गतेबाट चलचित्र प्रदर्शनमा आउने जनाइएको छ । 

अभिनेता प्रदीप खड्काको पहिलो हिन्दी चलचित्र ‘ऐरी’ निर्माणको घोषणा पनि केही दिनअघि मात्रै भएको थियो । ‘बुलबुल’ फ्रेम्ड निर्देशक विनोद पौडेलले ‘भूठान’ नामक चलचित्र बनाउँदैछन् । हरिवंश आचार्य, विपिन कार्की लगायतको अभिनय रहने चलचित्रको नाम र टिजर पोष्टर केही दिनअघि मात्रै सार्वजनिक गरिएको थियो । अमेरिकामा खिचिने चलचित्रको सन २०२४ को अन्त्यसम्म सुटिङ सक्ने र सन २०२५ मा प्रदर्शन गर्ने निर्माण पक्षको योजना छ ।

गत बिहीबार मात्रै चलचित्र ‘११ः ५५’ निर्माणको घोषणा गरिएको छ । राजधानीमा एक कार्यक्रमकाबीच घोषणा गरिएको चलचित्रमा सृष्टि श्रेष्ठ, महेश त्रिपाठी, महेश खनाल, करिश्मा श्रेष्ठ लगायतको अभिनय रहनेछ । क्राइम–थ्रिलर जनरामा बन्ने भनिएको चलचित्रलाई केशव पाण्डेले निर्देशन गर्दैछन् । चलचित्रको छायांकन आउँदो शनिबारबाट सुरु हुने जनाइएको छ । 

निर्माता एवं निर्देशक दीपकराज गिरी पनि नयाँ चलचित्रको तयारीमा छन् । चलचित्रको नाम सार्वजनिक नगरे पनि उनले आफ्नो चलचित्र आगामी वर्षको दशैंमा प्रदर्शनमा आउने घोषणा गरिसकेका छन् । यीबाहेक अन्य केही चलचित्र समेत पछिल्लो समय घोषणा भएका छन् ।