लोकतान्त्रिक समाजवादी पार्टी (लोसपा)का वरिष्ठ नेता राजेन्द्र महतोले पार्टीको केन्द्रीय समिति बैठक बहिष्कार गरेका छन् ।

आइतवार लोसपा केन्द्रीय समितिको बैठक जारी छ । मधेशवादका लागि लड्दै आएका योद्धासहित नेता तथा कार्यकर्तालाई केन्द्रीय समितिमा समावेश नगरेको हुनाले पार्टीको केन्द्रीय समिति बैठक बहिष्कार गरेको महतोले बताएका छन् ।

'२ वर्षको गम्भीर गृहकार्यका बाबजुद ३ महिनाअघि पार्टी अध्यक्ष महन्थ ठाकुरले एकलौटी ढंगले केन्द्रीय समिति विस्तार गर्नुभयो, तर वर्षौंअघि गजेन्द्रनारायण सिंहकै स्कूलिङमा काम गरेका मधेशवाद पक्षधर ३ दर्जन जति कार्यकर्तालाई समितिमा समावेश गर्नुभएन,' महतोले लोकान्तरसँग भने, '१६ जना महासचिव, १७ जना उपाध्यक्षसहित नमूना पदाधिकारीको टोली बनाउँदा पनि ती मधेशवादका लागि लडेका  कार्यकर्तालाई समावेश नगरेकाले विरोधस्वरूप आज बसेको केन्द्रीय समितिको बैठक बहिष्कार गरेको हो ।' 

२ महिनाअघि बसेको कार्यकारिणी समिति बैठकमा आफूले त्यो विषय उठाउँदा भएको त्रुटि र कमजोरीलाई सच्याएर छुटेका साथीलाई सामावेश गर्ने भनेर अध्यक्षले प्रतिबद्धता जनाए पनि नसच्याएकाले त्यसको विरोध स्वरूप बैठक बहिष्कार गरेको उनले बताए ।

३११ सदस्यीय समितिलाई ४११ सदस्यीय बनाएर छुटेकालाई समावेश गर्ने भने पनि त्यसो नहुँदा आफूले विरोध गरेको उनको कथन छ ।

'त्यसै पनि नेतृत्वकै कारण पार्टी पतनको दिशामा गइसकेको छ । पार्टीले राष्ट्रिय पार्टीको मान्यता पाएन,' उनले भने, 'भएकाहरू पनि हुलका हुल दिनैपिच्छे पार्टी छाडेर अन्य पार्टीमा गइरहेका छन् । पद भएकाहरू मजबुरीवश पार्टीमा बसेका छन् ।'