लोसपामा खटपटदेखि शेखर कोइराला समूहको बैठक आह्वानसम्म

‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
लोकतान्त्रिक समाजवादी पार्टी (लोसपा)का वरिष्ठ नेता राजेन्द्र महतोले पार्टीको केन्द्रीय समिति बैठक बहिष्कार गरेका छन् ।
आइतवार लोसपा केन्द्रीय समितिको बैठक बसेको छ । मधेशवादका लागि लड्दै आएका योद्धासहित नेता तथा कार्यकर्तालाई केन्द्रीय समितिमा समावेश नगरेको हुनाले पार्टीको केन्द्रीय समिति बैठक बहिष्कार गरेको महतोले बताएका छन् । यससँगै लोसपामा विभाजनको बिउ रोपिएको छ । यसैबीच महतोको बहिस्कारका बीच बसेको बैठक एक दिनमै ९ प्रस्ताव पारित गर्दै सकिएको छ । 
००००
सर्वोच्च अदालतका लागि प्रस्तावित ६ जना न्यायाधीशमाथि आउँदो मङ्सिर २९ गते संसदीय सुनुवाइ हुने भएको छ । आइतबार बसेको संसदीय सुनुवाइ समितिमा १० जना उजुरीकर्तासँग समितिले छलफल गरेको छ ।
००००
नेपाली कांग्रेसका नेता डा शेखर कोइरालाले आफ्नो समूहको बैठक बोलाएका छन् । आगामी महासमिति बैठकसहितका विषयमा छलफल गर्न कोइरालाले आगामी मंगलवार समूहको बैठक बोलाएका नेता डा गोविन्दराज पोखरेलले जानकारी दिए ।
००००
काठमाडौँ महानगरपालिकाले स्रोत शिक्षक पदपूर्तिका लागि अन्तिम नतिजा प्रकाशन गरेको छ । स्रोत शिक्षक छनोट समितिको आइतबार बसेको बैठकले मंसिर २३ गते सञ्चालन भएको विषयगत लिखित तथा प्रयोगात्मक परीक्षा र अन्तरवार्ताको प्राप्ताङ्कका आधारमा योग्यता क्रम निर्धारण भएका उम्मेदवारलाई नियुक्तिका लागि सिफारिस गर्ने निर्णय गरेको हो ।
००००
नेपाल प्रहरीले गत बिहीबार नागढुङ्गाबाट बरामद भएको दुई किलोग्राम सुन प्रकरणमा चिनियाँ नागरिकलाई पक्राउ गरेको छ ।
काठमाडौँ उपत्यका अपराध अनुसन्धान कार्यालयले बरामद सुन ओसारपसारमा संलग्न रहेको आरोपमा काठमाडौँको सोह्रखुट्टे बस्दै आएका २७ वर्षीय चिनियाँ नागरिक चेन झिउइलाई आज पक्राउ गरेको हो ।
००००
पोखरामा कारले स्कुटरलाई ठक्कर दिँदा स्कुटरमा सवार दुई युवतीको मृत्यु भएको छ । मृत्यु हुनेमा पोखरा महानगरपालिका—२५ हेमजा निवासी २३ वर्षीया अनिशा खड्का  र पोखरा—५ बस्ने २४ वर्षीया भावना बराल छन् ।
००००
बागमती प्रदेशका प्रदेश प्रमुख यादवचन्द्र शर्मा अस्वस्थ भई अस्पतालमा भर्ना भएका छन् । शनिवार बिहानदेखि ज्वरो आएपछि उनलाई आइतबार अस्पताल भर्ना गरिएको हो ।
००००
एसीसी यू–१९ एसिया कप क्रिकेटमा नेपाल अफगानिस्तानसँग ७३ रनले पराजित भएको छ । दुबईमा जारी उक्त प्रतियोगिता अन्तर्गत आजको खेलमा २६२ रनको लक्ष्य पाएको नेपाल ४०.१ ओभरमा १८८ रनमा अल आउट भएको हो ।
००००
प्रधानमन्त्री पुष्पकमल दाहाल प्रचण्डका प्रमुख राजनीतिक सल्लाहकार हरिबोल गजुरेलले राजीनामा दिएका छन् ।
गजुरेलले मंसिर २० गते  नै राजीनामा दिएका हुन् । यद्यपि उनको राजीनामा भने स्वीकृत भइसकेको छैन । उनले राजीनामाको कारण खुलाएका छैनन् । यसैबीच प्रधानमन्त्रीको सचिवालयमाथि सांसद अमरेश कुमार सिंहले आर्थिक चलखेलको आरोप लगाएका छन् । यसको सचिवालयले भने खण्डन गरेको छ । 
००००
संघीय मामिला तथा सामान्य प्रशासन मन्त्रालयले स्थानीय तहमा प्रमुख प्रशासकीय अधिकृतको सरुवासम्बन्धी मापदण्ड बनाएको छ । मन्त्रालयको कर्मचारी प्रशासन महाशाखाले बनाएको मापदण्ड आइतवार मन्त्री अनिता देवी साहको टेबलमा पुगेको छ ।

मन्त्रालयको कर्मचारी प्रशासन महाशाखा प्रमुख सुमन दाहालले उक्त मापदण्ड स्वीकृतिका लागि मन्त्रीको टेबलमा पुगेको बताए ।

दाहालका अनुसार स्थानीय तहमा प्रमुख प्रशासकीय अधिकृतको सरुवा निजामती सेवा ऐनको आधारमा नभएर स्थानीय सरकार सञ्चालन ऐनको आधारमा हुनुपर्ने प्रावधान राखिएको छ ।
००००
रूपन्देहीको भैरहवास्थित गौतमबुद्ध अन्तर्राष्ट्रिय विमानस्थल नियमित र पूर्ण रूपमा सञ्चालन गर्दै ‘एयरपोर्ट’मा आइतवारदेखि निजी क्षेत्रले धर्ना शुरू गरेका छन् ।

पटक–पटक सरकारको ध्यानाकर्षण गराए पनि त्यसको कुनै सुनुवाइ नभएपछि रूपन्देहीको निजी क्षेत्र चरणबद्ध आन्दोलनमा उत्रेका हुन् । धर्नामा लुम्बिनी प्रदेशका गृहमन्त्री सन्तोषकुमार पाण्डेय पनि सहभागी छन् ।
००००
उपप्रधान तथा गृहमन्त्री नारायणकाजी श्रेष्ठ अस्पतालबाट डिस्चार्ज भएका छन् । स्वास्थ्यमा उल्लेखनीय सुधार भएकोले उनलाई आइतवार डिस्चार्ज गरिएको हो ।
००००
काठमाडौंबाट लुक्ला जाँदै गरेको तारा एयरको कार्गो उडानका क्रममा जहाजको आपतकालीन ढोकाको सिसा खसेको छ ।
तारा एयरको नाइन एन एएलओ कल साइनको जहाज आइतवार बिहान ९ः३१ मा काठमाडौंबाट १ हजार १२६ केजी सामान लिएर उडेको थियो ।
००००
क्रिकेटर सन्दीप लामिछाने विरुद्धको मुद्दा कानुन व्यवसायीको तर्फबाट स्थगित गरिएको छ । चितवनमा नेपाल बार एसोसिएसनको गोष्ठीका कारण अधिवक्ता उपस्थित हुन नसक्ने भएपछि मुद्दा स्थगित गरिएको हो ।