सुदूरपश्चिमको झुलाघाटबाट मंसिर १४ गते शुरू भएको एमालेको मध्यपहाडी संकल्प यात्रा आज खोटाङको दिक्तेलबाट भोजपुर प्रवेश गर्दै छ । एमाले अध्यक्ष केपी शर्मा ओली सहितको टोली बुधवार बिहान खोटाङको दिक्तेलबाट भोजपुर प्रस्थान गर्ने कार्यक्रम छ । ओली सहितका नेताहरूले भोजपुरको टेम्केमयुङ गाउँपालिकामा खाना खानेछन् । 

संकल्प यात्रामा सहभागी नेता तथा कार्यकर्तालाई दुना टपरीमा दालभात तरकारी र मासु खुवाउने कार्यक्रम रहेको एमाले भोजपुरका उपाध्यक्ष मकर खड्काले जानकारी दिए । खड्काका अनुसार राँगा र खसीको मासु नेताहरूलाई खुवाइने छ । 

आज सभा भने नरहेको एमाले भोजपुरले जनाएको छ । बिहान टेम्केमयुङमा कायकर्ताहरूसँग भेटघाट गर्ने र दिउँसो भोजपुर बजारमा जनभेटघाट र टक्सार बजारको अनुगमन तथा उद्योगी व्यापारीहरूसँग छलफल गर्ने कार्यक्रम रहेको उनले बताए । 

संकल्प यात्रा शुरू गर्दा कोशीका पहिचानवादीहरूप्रति कडा अभिव्यक्ति दिएका ओली सोमबारसम्म पहिचान पक्षधरप्रति आक्रामक देखिएका थिए । माझ किरातमा प्रवेश गरेपछि भने उनी एकाएक नरम बनेका छन् । मंगलबार माझ किरात प्रवेश गरेसँगै उनको स्वर पहिचानवादीप्रति नरम बनेको हो । 

ओखलढुङ्गाको हर्कपुरमा आयोजित सभालाई उनले सम्बोधन गरेका थिए । सम्बोधनमा उनी नरम देखिएका थिए । त्यहाँ उनले पहिचानवादीहरूलाई गाली गरेनन् । 

पहिचानवादीहरूलाई आतंककारीसम्म भन्न भ्याएका ओलीले हर्कपुरको सम्बोधनमा दाजुभाइ भनी सम्बोधन गरेका थिए । उनले पहिचानवादीको नाममा भइरहेको आन्दोलनमा सहभागीहरू भावनामा बगिरहेको भन्दै वैधानिक र शान्तिपूर्ण रूपमा चल्नु पर्ने बताए । 

पहिचानवादीहरू प्रदेशको नाम कोशी राखेपछि निरन्तर आन्दोलनमा छन् । उनीहरूले प्रदेशको नाम परिवर्तन गर्नुपर्ने माग गर्दै दबाबमूलक अभियान चलाइरहेका छन् । 

त्यसप्रति नेकपा एमाले कठोर बनेपछि उनीहरूले नेकपा एमालेको मध्यपहाडी समृद्धि यात्रालाई अवरोध गर्ने घोषणा गरेका छन् । 

आन्दोलनकारीहरूले एमाले अध्यक्ष ओली, सचिव योगेश भट्टराई र महेश बस्नेतलाई पहिचान पक्षधर शक्तिविरुद्ध अभिव्यक्ति दिएको र ८२ जना सांसदले कोशी नामको पक्षमा मतदान गरेको भन्दै उनीहरुविरुद्ध आन्दोलन केन्द्रित गरेका हुन् ।