कोइरीलाई सफाइ- बालकृष्णलाई रिहा गर्न आदेश, ओलीमाथि आक्रमणबारे एमालेको प्रतिक्रिया

‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–

मध्यपहाडी संकल्प यात्राअन्तर्गत बिहीवार धनकुटाको लेगुवा पुगेका नेकपा एमालेका अध्यक्ष केपी शर्मा ओलीमाथि आक्रमण भएको छ ।

फूलमाला र अबिरले स्वागत गर्ने लाइनमा बसेका एक व्यक्तिले ओलीलाई टाउकोमा मुक्का प्रहार गरेका हुन् । तर उनले हानेको मुक्का ओलीलाई चोट पर्नेगरी भने लागेन ।

तर, नेकपा एमालेले  मादक पदार्थ सेवनबाट उत्तेजित बनेका व्यक्तिले अध्यक्ष ओलीमाथि अस्वाभाविक व्यवहार देखाएको बताएको छ । 

प्रचार विभाग प्रमुख राजेन्द्र गौतमले एक वक्तव्य जारी गर्दै  लेगुवा बजारमा जनताबाट स्वागत लिने क्रममा मादक पदार्थ सेवनबाट उत्तेजित बनेका महेश राईले अस्वभाविक व्यवहार गरेको बताएका हुन् । 
सोही विषयमा सामाजिक सञ्जालमा अनर्गल प्रचार भएको भन्दै उनले पार्टीको ध्यानाकर्षण भएको जनाएका छन् । 

‘हाम्रो पार्टीका अध्यक्ष कमरेड केपी शर्मा ओली आज भोजपुरबाट धनकुटा जाने क्रममा लेगुवा बजारमा जनताबाट स्वागत लिने क्रममा मादक पदार्थ सेवनबाट उत्तेजित बनेका महेश राई (महालक्ष्मी नपा ५ निवासी)भन्ने  व्यक्तिले देखाएको अस्वभाविक व्यवहारलाई लिएर सामाजिक सञ्जालमा अनर्गल प्रचार भएकोप्रति हाम्रो ध्यानाकर्षण भएको छ’, उनको वक्तव्यमा भनिएको छ, ‘तथ्य नबुझी अनर्गल प्रचार नगर्न ,जनमानसमा  भ्रम नछर्न, सम्वन्धित  सवैमा हार्दिक  अपिल गर्दछु।’
००००
व्यावसायिक कम्प्लेक्स तथा भवनहरूले सेवाग्राहीसँग पार्किङ शुल्क उठाउन नपाउने काठमाडौं महानगरपालिकाको निर्णय सर्वोच्च अदालतले खारेज गरिदिएको छ ।

सम्पत्ति उपभोग वा व्यवसाय गर्ने हकमा अंकुश लगाउने देखिएको भन्दै सर्वोच्च अदालतको संवैधानिक इजलासले काठमाडौं महानगरपालिका आर्थिक ऐन, २०८० को एक दफा र अनुसूचीका केही व्यवस्था खारेज गरिदिएको हो ।
००००
नक्कली भुटानी शरणार्थी प्रकरणमा पूर्व गृहमन्त्री बालकृष्ण खाँण ३० लाख धरौटीमा रिहा हुने भएका छन् ।
उच्च अदालत पाटनका न्यायाधीश कृष्णराम कोइरालाको इजलासले ३० लाख धरौटीमा रिहा गर्न आदेश गरेपछि खाँण कारागारमुक्त हुने भएका हुन् ।
००००
असई थमन विक हत्या प्रकरणमा प्रदेश सांसद अभिराम शर्मासहित ७ जनालाई जन्मकैदको फैसला भएको छ ।
जिल्ला अदालत महोत्तरीका न्यायाधीश उद्धबप्रसाद भट्टराईको इजलासले बिहीवार यस्तो फैसला सुनाएको हो । यद्यपि निलम्बित प्रतिनिधिसभा सदस्य लक्ष्मी महतो कोइरीले भने सफाइ पाएका छन् ।
००००
नेपाली कांग्रेसका दुवै महामन्त्रीको आसन्न महासमिति बैठकमा एउटै प्रस्ताव लानलाई संयुक्त बनाउने बैठक गरेका छन् । 

महामन्त्रीद्वय गगन थापा र विश्वप्रकाश शर्माले बिहीवार काठमाडौंमा संयुक्त बैठक गरेका हुन् ।
बैठकले आसन्न महासमिति बैठकमा प्रस्तुत गर्ने महामन्त्री थापाको सांगठनिक प्रस्ताव र अर्का महामन्त्री शर्माको समसामयिक राजनीतिक प्रस्तावलाई संयुक्त बनाइ अन्तिम रुप दिने बताइएको छ ।
००००
सरकारले २५ वटा आवश्यक सेवामा हड्ताल गर्न निषेध गरेको छ ।    
सरकारले बिहीवार गते राजपत्रमा सूचना प्रकाशित गरेर विभिन्न २५ वटा आवश्यक सेवामा हड्ताल गर्न निषेध गरेको हो ।
००००
सरकारले नेपाली सेनाका उपरथी अशोकराज सिग्देललाई रथीमा बढुवा गरेको छ । 

बिहीवार सिंहदरबारमा बसेको मन्त्रिपरिषद् बैठकले सिग्देललाई रथीमा बढुवा गरेको सरकारकी प्रवक्तासमेत रहेकी सूचना तथा सञ्चार प्रविधिमन्त्री रेखा शर्माले जानकारी दिइन् । सोही बैठकलेसहसचिव सेवा लम्साललाई सचिवमा बढुवा गरेको छ ।
००००
नेपाली कांग्रेसका केन्दी्रय सदस्य डा शेखर कोइरालाले नेकपा माओवादी केन्द्र नेतृत्वको सरकारले सुशासन दिन नसकेको बताएका छन् । 

विराटनगर विमानस्थलमा बिहीवार पत्रकारहरूसँग कुरा गर्दै उनले माओवादी नेतृत्वको वर्तमान सरकारले सुशासन दिन नसक्ने भन्दै अब सरकार परिवर्तन गर्नुमा जोड दिए ।
००००
नेपाल सुपर लिग फुटबल प्रतियोगितामा एफसी चितवनलाई पराजित गर्दै धनगढी फुटबल क्लब अङ्कतालिकाको शीर्षस्थानमा उक्लेको छ ।
००००
कञ्चनपुरको भीमदत्त नगरपालिकामा स्वर्गीय राजा महेन्द्र शाहको शालिक राख्ने विषयलाई लिएर राजनीतिक दलबीच मत भिन्नता देखिएको भन्दै स्थानीय प्रशासनले निषेधाज्ञा लगाएको छ ।

जिल्ला प्रशासन कार्यालय, कञ्चनपुरले बिहीवारदेखि लागू हुनेगरी ७ दिनसम्मका लागि निषेधाज्ञा जारी गरेको हो ।
००००
१४ किलो सुन प्रकरणमा त्रिभुवन विमानस्थलकी सरसफाइ सुपरभाइजर सुशीला पाण्डे पक्राउ परेकी छन् ।
अनुसन्धानका लागि उनलाई पक्राउ गरिएको त्रिभुवन विमानस्थल भन्सार कार्यालयका प्रमुख भन्सारक टोकराज पाण्डेले जानकारी दिए ।
००००
अर्थतन्त्रका बाह्य सूचकहरू सकारात्मक नै रहे पनि सरकारको राजस्व आम्दानीभन्दा खर्च बढी रहेको पाइएको छ ।
नेपाल राष्ट्र बैंकले सार्वजनिक गरेको पछिल्लो ४ महिनाको तथ्यांकअनुसार सरकारी खर्च साढे ३ अर्बभन्दा माथि हुँदा राजस्व परिचालन करिब पौने ३ अर्ब मात्र रहेको पाइएको हो ।

यसैबीच अर्थमन्त्री डा प्रकाशशरण महतले अर्थतन्त्रका सूचकहरूमा सुधार हुँदै गएको दाबी गरेका छन् । नेपाल ट्रेड युनियन कांग्रेसले बिहीबार ललितपुरमा आयोजित औद्योगिक नीति तथा श्रम सम्बन्ध विषयक कार्यक्रममा उनले बैंक तथा वित्तीय संस्थाको ब्याजदर घट्दै र रेमिट्यान्स बढ्दै गएकोले अर्थतन्त्रका सबै सूचकमा सुधार हुँदै गएको दाबी गरे ।