त्रिविको दीक्षान्तमा विश्व रेकर्डदेखि बालेन हिँड्दा प्रचण्डलाई ‘इरिटेसन’सम्म

‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–

नेपाली कांग्रेसका सभापति शेरबहादुर देउवाले नेपालको संविधानअनुसार कुनै एक दलले बहुमत ल्याउन सक्ने अवस्था नभएका कारण एकभन्दा बढी दल मिलेर सरकार बनाउन बाध्य भएको बताएका छन् । 

नेपाली कांग्रेस नुवाकोटको ‘प्रथम जिल्ला सम्मेलन’लाई विदुरमा सम्बोधन गर्दै सभापति देउवाले समावेशी र समानुपातिक निर्वाचन प्रणालीलाई सुनिश्चित गराई ‘राम्रो संविधान’ बनाएको कारण राजनीतिक दलले बहुमत ल्याउन सक्ने अवस्था नभएको बताए ।
००००
भूकम्प प्रभावितका लागि अस्थायी आवास निर्माणमा उच्च प्राथमिकता दिएको सरकारले रु एक अर्ब रुपैयाँ निकासा गरेको छ ।
राष्ट्रिय विपद जोखिम न्युनिकरण तथा व्यवस्थापन प्राधिकरणका अनुसार अर्थ मन्त्रालयबाट निकासा भएको सो रकम मध्ये  सोमबार रु  ९३ करोड सम्बन्धीत  जिल्लामा पठाइएको छ ।
००००
प्रधानमन्त्री पुष्पकमल दाहाल ‘प्रचण्ड’ लाई ज्यापू संस्कृति विकास कोषले यही पुस १० गते नागरिक अभिनन्दन गर्नेभएको छ ।
  राष्ट्रिय ज्यापू दिवसको सन्दर्भमा प्रधानमन्त्री दाहाललाई वसन्तपुरमा एक कार्यक्रमकाबीच नागरिक अभिनन्दन गर्न लागेको व्यवहोरासहित सोमबार बालुवाटारमा झाँकीसहित कोषले निमन्त्रणापत्र दिएको हो ।
००००
नेकपा माओवादी केन्द्रका उपमहासचिव वर्षमान पुनले अहिलेको नयाँ शक्ति भनेको माओवादी भएको दाबी गरेका छन् । हेटौँडामा प्रेस सेन्टर मकवानपुरले आयोजना गरेको पत्रकार सम्मेलनमा उहाँले सरकारले राम्रा काम गर्न खोज्दा सबैतिरबाट घेराबन्दी भएको बताए ।
००००
अखिल नेपाल फुटबल संघको प्रमुख कार्यकारी अधिकृतमा इन्द्रमान तुलाधर नियुक्त भएका छन् ।
सोमवार बसेको एन्फा कार्यसमिति बैठकले एन्फाका पूर्व महासचिव तुलाधरलाई सीईओ र सहायक कोषाध्यक्षमा प्रवीण कुमार यादवलाई नियुक्त गरेको हो ।
००००
बाराको जीतपुर सिमरा उपमहानगर–३ का वडा अध्यक्ष ताराबहादुर कार्की पक्राउ परेका छन् ।
उनलाई अख्तियार दुरुपयोग अनुसन्धान आयोग हेटौंडाबाट खटिएको टोलीले ५ लाख घुससहित सोमवार दिउँसो पक्राउ गरेको हो ।
००००
संयुक्त अरब इमिरेट्स (यूएई) पठाउने भन्दै साढे २ करोडभन्दा धेरै ठगी गरेको आरोपमा एक जना पक्राउ परेका छन् ।
पक्राउ पर्नेमा काठमाडौंको कागेश्वरी मनहरा नगरपालिका ७ का कोमलराज उपाध्यय छन् । उनलाई इन्टरपोलको सहयोगमा मंसिर २९ गते दुबईबाट पक्राउ गरी नेपाल ल्याइएको हो ।
००००
धितोपत्र बजारमा शेयर कारोबार मापक नेप्से परिसूचक सोमवार उच्च अङ्कले वृद्धि भएको छ ।
नेपाल स्टक एक्सचेञ्जका अनुसार नेप्से परिसूचक ३८ दशमलव १४ अङ्कले उकालो लागेर दुई हजार ६० दशमलव ४९ मा पुगेको छ । 
००००
लुम्बिनी प्रदेशसभाका संसदीय समितिको निर्वाचन पुस दोस्रो साता हुने भएको छ । प्रदेशसभा शुरू भएको एक वर्षसम्म गठन हुने नसकेका विषयगत समितिको नेतृत्व चयनका लागि यही पुस १७ गते निर्वाचन हुने भएको हो ।
००००
प्रधानमन्त्री पुष्पकमल दाहाल ‘प्रचण्ड’ले नारायणगढ–बुटवल र मुग्लिन–पोखरा सडकखण्डमा जनताले भोग्नुपरेका समस्याको अन्त्य गर्न निर्देशन दिएका छन् ।

प्रधानमन्त्री तथा मन्त्रिपरिषद्को कार्यालय सिंहदरबारमा रहेको एक्सन रूमबाट सोमवार दिउँसो निर्माणाधीन दुई सडकखण्डको भर्चुअल निरीक्षण गर्दै प्रधानमन्त्रीले यस्तो निर्देशन दिएका हुन् ।
००००
त्रिभुवन विश्वविद्यालयका कुलपतिसमेत रहेका प्रधानमन्त्री पुष्पकमल दाहाल ‘प्रचण्ड’ले विश्वविद्यालयहरूमा राजनीतिक भागबन्डाको अन्त्य गरी मेरिटका आधारमा पदाधिकारीहरू नियुक्त गर्ने बताएका छन् ।

सोमवार दिउँसो त्रिपुरेश्वरमा आयोजित त्रिभुवन विश्वविद्यालयको ४९ औं दीक्षान्त समारोहलाई सम्बोधन गर्दै प्रधानमन्त्रीले यस्तो प्रतिबद्धता जनाएका हुन् । त्रिविको दीक्षान्त समारोहमा १२ हजार भन्दा बढी दीक्षित भएका थिए । 
००००
समाजवादी मोर्चा नेपालले आफ्नो घटकका नेता नेत्रविक्रम चन्द विप्लवसहितका नेताविरुद्ध पक्राउ पुर्जी जारी भएकोप्रति गम्भीर ध्यानाकर्षण भएको जनाएको छ ।

काठमाडौं जिल्ला अदालतले पक्राउ पुर्जी जारी गरेको दुई सातापछि मोर्चाका संयाजेक माधव नेपालले एक विज्ञप्ति जारी गर्दै ध्यानाकर्षण भएको जनाएका हुन् ।
००००
यसैबीच त्रिविले ४९औं दीक्षान्त समारोहमा धेरै विद्यार्थी सहभागी गराएर कीर्तिमान बनाएको छ ।

त्रिपुरेश्वरस्थित दशरथ रङ्गशालामा सोमवार भएको समारोहमा त्रिविले २६ हजारभन्दा बढी विद्यार्थी सहभागी गराएर कीर्तिमान बनाएको हो । 

सबैभन्दा धेरै विद्यार्थी सहभागी गराएर कीर्तिमान कामय गरेकोमा अफिसियल वल्र्ड रेकर्ड–ओडब्लुआरले त्रिविलाई प्रमाणपत्र प्रदान गरेको छ ।
र यो पनि....
काठमाडौं महानगरपालिकाका प्रमुख मेयर बालेन्द्र शाह (बालेन)ले आफ्नो कुरा सुन्दै नसुनेर हिँडेको भन्दै प्रधानमन्त्री पुष्पकमल दाहाल प्रचण्डले आक्रोश व्यक्त गरेका छन् । ललितपुर महानगरको स्थापना दिवसको अवसरमा सोमवार आयोजित कार्यक्रममा प्रमुख अतिथि रहेका प्रचण्डको कुरा नसुनी बालेन हिँडेका थिए । 

पहिला बोल्ने र प्रमुख अतिथिको कुरा नसुन्नेसँग आफूलाई इरिटेसन हुने प्रचण्डले बताए । ‘बालेन्द्रजी हिँड्नुभयो, पहिला बोलेर हिड्नेसँग अलिअलि इरिटेसन हु्न्छ, आफैंले भन्ने कुरा भनिहाल्ने, तर त्यसको जवाफ सुन्न बस्दै नबस्ने गर्नु हुँदैन । बस्नुपर्छ, प्रमुख अतिथिले बोल्ने समयसम्म बस्नु पर्छ’ प्रचण्डले भने । 

सम्बोधनका क्रममा बालेनले बागमतीमा अतिक्रमण गरेर बसेका सुकुम्बासी समस्या समाधान तथा उपत्यकाको फोहोर समाधानमा सरकारले सहयोग नगरेको आरोप लगाएका थिए ।