कोशीमा अप्रत्याशित नतिजा, माओवादी असन्तुष्ट

‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
बिहीबार भएको राष्ट्रियसभा निर्वाचनमा १९ मध्ये १८ सिटमा सत्ता गठबन्धनका उम्मेदवार विजयी भएका छन् । कोशी प्रदेश भने गठबन्धनको मत क्रस हुँदा एक सिटमा अप्रत्यासित नतिजा आएको छ । जसका कारण माओवादी केन्द्र असन्तुष्ट बनेको छ । 

कोशी प्रदेशमा सत्ता गठबन्धनकी माओवादी उम्मेदवार चम्पा कार्कीलाई पराजित गर्दै एमालेकी रुक्मिणी कोइरालाले बाजी मारेकी हुन् । 
गठबन्धनको बहुमत रहेको प्रदेशमा भोट क्रस गराएर एमालेले बाजी मारेको हो । कोइरालाले ५ हजार ८६ मत पाउँदा कार्कीले ४ हजार ९९२ मत मात्र प्राप्त गरिन् ।
माओवादी केन्द्रका नेताहरूले काँग्रेसका केही नेताहरूको भूमिकामाथि प्रश्न उठाउँदै आगामी सहकार्यबारे नै पुनर्विचार गर्नुपर्ने अवस्था आएको टिप्पणी गर्न थालेका छन् । उलटपलट नतिजामा काँग्रेस नेता सुनिल शर्माको भूमिकामाथि सबैभन्दा धेरै आशङ्का गरिएको छ । 

‘हामीलाई पटक पटक काँग्रेसले धोको दियो,’ माओवादी केन्द्र कोशी प्रदेशका अध्यक्ष हर्क नेम्बाङ मिक्सोले भने, ‘काँग्रेसले छुरा रोप्ने काम गर्यो । अव हामी सरकारका विषयमा तुरुन्तै निर्णय गरिहाल्छौँ ।’ उनले अब चाँडै बसेर निर्णय गर्ने बताए । उनले इन्द्र बहादुर आङ्वोलाई मुख्यमन्त्री हुन छेक्ने समूहले नै असहयोग गरेको आरोप लगाएका छन् ।
००००
प्रतिनिधि सभा ३२ सीटसहित तेस्रो स्थानमा रहेको नेकपा माओवादी केन्द्र राष्ट्रिय सभामा पहिलो दल बन्ने भएको छ । कुनै समय ठूलो अन्तरसहित पहिलो स्थानमा रहेको एमाले निरन्तर खुम्चिँदै तेस्रोमा झर्ने देखिएको छ । एमालेको स्थान अब आफैंबाट टुक्रिएर बनेको नेकपा एकीकृत समाजवादीको हाराहारीमा हुनेछ ।
फागुन २० पछि नवनिर्वाचित सांसदहरूले पदभार ग्रहण गर्दा राष्ट्रिय सभामा एमालेका १० र एकीकृत समाजवादीका ८ सदस्य हुनेछन् । 
राष्ट्रिय सभाका १९ सदस्यका चयनका लागि बिहीबार भएको निर्वाचनमा आफ्नो भागबन्डामा परेका ६ मध्ये ५ उम्मेदवारलाई विजयी गराएर माओवादी पहिलो दल बन्ने भएको हो ।
००००
स्वतन्त्र उम्मेदवारी दिएर निर्वाचित तीन जना मेयरले राष्ट्रियसभा निर्वाचनको मतदान बहिस्कार गरेका छन् । काठमाडौँ महानगरपालिका मेयर बालेन्द्र शाह ‘बालेन’, धरान उपमहानगरपालिका मेयर हर्क राई ‘साम्पाङ’ र धनगढी उपमहानगरपालिकाका मेयर गोपाल हमाल ‘गोपी’ले मतदान बहिस्कार गरेका हुन्  ।
००००
राष्ट्रिय सतर्कता केन्द्रले बिहीबार दुई मन्त्रालय र दुई विभागमा गरेको छड्के अनुगमनमा ७८ जना कर्मचारी अनुपस्थित रहेको तथा ७१ जना कर्मचारी समयभन्दा ढिला पुगेको पाइएको छ ।
केन्द्रका उपसचिव हिरामणि सुवेदीका अनुसार ५३ जना कर्मचारी सीट छड्के (हाजिरी गरेर हिँडेको) र २० जना कर्मचारी तोकिएको पोशाक नलगाई कार्यालय आएको पाइएको थियो ।
००००
मधेश प्रदेश सरकारको ‘बेटी पढाऊ, बेटी बचाऊ’ कार्यक्रमअन्तर्गत साइकल खरिदमा भ्रष्टाचार गरेको प्रकरणमा तत्कालीन प्रदेश सचिव यामप्रसाद भुसाल र सिनियर डिभिजनल इन्जिनियर भगवान झा दोषी ठहर भएका छन् ।
उनीहरूलाई विशेष अदालत, काठमाडौले बिहीवार दोषी ठहर गरेको हो ।
००००
घाटामा रहेको राष्ट्रिय ढुकुटीको चाबी बोकेर अर्थमन्त्री डा प्रकाशशरण महतले पछिल्लो ६ महिनामा ७ पटक विदेश भ्रमण गरेका छन् ।
सरकारी हिसाबकिताब राख्ने महालेखा नियन्त्रक कार्यालयको पछिल्लो तथ्यांकअनुसार लक्ष्यभन्दा निकै कम राजस्व असुली भएको छ । चालू आर्थिक वर्षको सातौं महिनासम्म आइपुग्दा २० प्रतिशत पनि पूँजीगत खर्च हुन सकेको छैन । सरकारको ढुकुटी रित्तो मात्र होइन, ऋणात्मक छ ।
००००
‘जेरी’ उपनामले परिचित लोकदोहोरी गायिका बबिता बानियाँले ठमेलमा दोहोरी साँझ खोलेकी छन् ।  यो दोहोरी साँझमा ‘जेरी’सहित गायक कमल विष्टलगायतको लगानी छ ।
००००
अख्तियार दुरुपयोग अनुसन्धान आयोगले ७ हजार घुससहित सहायक वन अधिकृतलाई नियन्त्रणमा लिएको छ । अख्तियारले बिहीबार घुससहित बाँकेको सब–डिभिजन वन कार्यालय राँझामा कार्यरत सहायक वन अधिकृत नारायण पार्देलाई नियन्त्रणमा लिएको हो ।