भारतीय पर्यटकहरूलाई लक्षित गरी सम्राट ग्रुपले भैरहवामा सुविधासम्पन्न चारतारे ल्याण्डमार्क होटल एण्ड रिसोर्ट सञ्चालनमा ल्याएको छ ।

काठमाडौं, पोखरा र सौराहापछि सम्राट ग्रुपले आर्थिक तथा व्यापारिक केन्द्र रुपन्देहीको भैरहवामा ५० करोड रुपैयाँको लगानीमा ल्याण्डमार्कको चौथो शाखा विस्तार गरेको हो ।

३२ वर्षको ‘हस्पिटालिटी’ (होटल र रेष्टुरेण्ट) क्षेत्रको अनुभवसँगै बेलहिया नाका भएर नेपाल आउने भारत र तेस्रो मुलुकका पर्यटकलाई मुख्य ‘टार्गेट’ गरी होटल सञ्चालनमा ल्याइएको प्रमुख कार्यकारी अधिकृत (सीईओ) सीएन पाण्डेले जानकारी दिए ।​​​

हस्पिटालिटीको क्षेत्रमा ल्याण्डमार्कको छुट्टै पहिचान छ । पाण्डेका अनुसार होटलमा अहिले डिलक्स, सुपर डिलक्स, फेमिली र जुनियर स्विट गरेर ५० कोठा रहेका छन् ।

भैरहवाका व्यवसायी आशा गुरुङले निर्माण गरेको भवनमा होटलको व्यवस्थापन जिम्मेवारी ल्यान्डमार्क समूहले लिएर चलाएको हो । होटेलको प्रमुख विशेषता सबै कोठा र शौचालयमा सूर्यको किरण आउने गरी भवन डिजाइन गरिएको छ ।​

ल्यान्डमार्क समूहका प्रबन्ध निर्देशक ओमप्रकाश पाण्डेले काठमाडौंको त्रिभुवन अन्तर्राष्ट्रिय विमानस्थलपछि धेरै पर्यटक भित्रिने स्थल नाका बेलहिया (सुनौली) भएकोले होटल विस्तार गरेको जनाए ।

होटलमा स्विमिङ पुलका साथै दुई वटा हल रहेका छन् । लगत्तै डेढ बिगाहामा एक हजार जना अट्ने हल, ३० वटा कोठा थप गरिनेछ ।

निकट भविष्यमा बर्दिया र लुम्बिनीसहितका अन्य पर्यटकीय गन्तव्यमा पनि शाखा सञ्चालन गर्ने योजना रहेको सीईओ पाण्डेले बताए ।

अहिले होटलमा १०० कर्मचारी रहेका छन् । ल्याण्डमार्क नेपाल भारत सीमाबाट साढे ३ किलोमिटर नजिक सिद्धार्थनगर नगरपालिका वडा नम्बर ३ मा पर्छ ।

पछिल्लो समय भैरहवा लुम्बिनी तारे होटलहरूको हव बन्दै गइरहेको छ ।