नेकपा एमाले, नेकपा माओवादी केन्द्र, राष्ट्रिय स्वतन्त्र पार्टी (रास्वपा) र जनता समाजवादी पार्टी नेपाल (जसपा)बीच सोमवार भएको ८ बुँदे सम्झौता सरकारको नेतृत्वमा आलोपालो गर्ने या नगर्ने भन्नेमा मौन देखिएको छ । सम्झौताको पहिलो नम्बर बुँदामा संयुक्त सरकारको नेतृत्व पुष्पकमल दाहाल प्रचण्डले गर्ने उल्लेख गरिएपनि समय नतोकिएको हो । 

‘राष्ट्रिय आवश्यकता र जनचाहनाअनुसार सरकारको कामलाई थप प्रभावकारी बनाउन तथा मुलुकको सुशासन, विकास, सामाजिक न्याय र समृद्धिका प्रश्नमा समान सोच राख्ने दलहरूका बीचमा सहकार्य आवश्यक रहेको महसुस गरी नेकपा (एमाले), नेकपा (माओवादी केन्द्र), राष्ट्रिय स्वतन्त्र पार्टी र जनता समाजवादी पार्टी, नेपालको सहभागितामा नयाँ संयुक्त सरकार गठन गर्ने । सरकारको नेतृत्व नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले गर्ने,’ सहमतिको पहिलो बुँदामा उल्लेख गरिएको छ । 

माओवादीका एक प्रभावशाली नेताले प्रतिनिधि सभाको बाँकी अवधिभर प्रचण्ड नै प्रधानमन्त्री बन्ने दाबी गरे । ‘अध्यक्ष प्रचण्ड र एमाले अध्यक्ष केपी शर्मा ओलीबिच कुनै भद्र सहमति भएको भए बेग्लै कुरा हो, तर आजको सहमतिको आशय प्रचण्ड पूरै कार्यकाल प्रधानमन्त्री बन्ने भन्ने नै हो,’ माओवादीका ती नेताले भने ।  

२०७४ सालमा चुनावी गठबन्धन गर्दा ओली र प्रचण्डलबीच आलोपालो सरकारको नेतृत्व गर्ने सहमति भएको गोप्य पत्र पछि बाहिरिएको थियो । तर, नेकपा एमालेका नेताहरू भने आलोपालो नेतृत्वबारे बोलेका छैनन् । ‘शीर्ष नेताबिच कुनै जेन्टलमेन्ट एग्रिमेण्ट भएपनि आलोपालो नेतृत्वबारे कुनै लिखित सम्झौता भएको छैन,’ एमाले स्रोतले भन्यो ।  

प्रधानमन्त्रीको कार्यकाल नतोकी राष्ट्रिय सभाको अध्यक्ष पनि माओवादी केन्द्रले पाउने सहमति भएको छ । ‘रिक्त रहेको राष्ट्रिय सभाको अध्यक्षमा नेकपा (माओवादी केन्द्र)का उम्मेदवार र उपाध्यक्षमा नेकपा (एमाले) का उम्मेदवारलाई समर्थन गर्ने,’ दोस्रो नम्बरको बुँदामा उल्लेख छ । 

कांग्रेससँगको गठबन्धनमा रहेको समयमा माओवादीले प्रचण्डले प्रधानमन्त्री हस्तान्तरण गर्ने बेला संवैधानिक परिषद्मा आफूहरू शून्य हुने भएकोले अध्यक्ष छाड्न नसकिने बताएको थियो । तर, एमाले सँगको गठबन्धन पछि माओवादीले प्रधानमन्त्री र राष्ट्रिय सभाको अध्यक्ष पनि पाएको छ । 

आइतबार साँझसम्मको छलफलमा प्रचण्डलाई प्रधानमन्त्रीमा समर्थन गरेर राष्ट्रिय सभाको अध्यक्ष आफूहरूले लिने एमालेको रणनीति थियो । तर, सोमवार साँझ जारी ८ बुँदे विज्ञप्तिमा राष्ट्रिय सभाको अध्यक्ष माओवादीले पाउने उल्लेख छ । 

चार दलले जारी गरेको ८ बुँदे सहमतिको ७ औ नम्बर बुँदामा वर्तमान मन्त्रिपरिषद् पुनर्गठन गरी सहमतिअनुसार नयाँ संयुक्त सरकार गठन गर्ने उल्लेख छ । प्रचण्डले सोमवार नै मन्त्रिमण्डल पुनर्गठन गरी तीन जना विनाविभागीय मन्त्री नियुक्त गरिसकेका छन् । गृह, अर्थ जस्ता महत्त्वपूर्ण मन्त्रालयमा सहमति भएपछि मन्त्रिमण्डललाई पूर्णता दिने गठबन्धनमा सहमति भएको छ ।