• सन्तोष गोदार

थुप्रै नयाँ वर्षहरू आए
थुप्रै नयाँ वर्षहरू गए 
नाथे नुन र ऊनको
जोह पनि गर्न नसक्ने नयाँ वर्ष 
बरु नआएकै जाती
टाप बजाउँदै हिँड्ने मुखियाका घोडाहरू
धपाउन नसक्ने नयाँ वर्ष
बरु नआएकै जाती

एकथान नयाँ सपना 
कोरल्न नसक्ने नयाँ वर्ष
बरु नआएकै जाती
नयाँ केही दिन नसक्ने 
नयाँ केही गर्न नसक्ने 
नयाँ वर्ष
कतै अलप पनि हुन्छ
कतै ध्यानमग्न भए पनि हुन्छ
कतै स्तुति गर्दै बसे पनि हुन्छ 
सिर्फ 
क्यालेन्डरका पानाहरू फेर्नका लागि
एकथान नयाँ वर्ष बरु नआएकै जाती

लालीगुराँस नफुलेको वर्ष
हिउँ फुस्फुसाउन बिर्सेको वर्ष
सत्ताको पासा र भत्ताको भकारी भर्न  
केही थान नयाँ वर्ष 
क्षितिजतिर अल्मलिएकै जाती
बाटो बिराएकै जाती
निराशा छर्ने नयाँ वर्ष
ऐँठन परेको बेला
पिन्चे अनुहार लिएर
दैलो छेउ नउभिएकै जाती

भुइयालाई केही दिन नसक्ने 
शासकलाई सबैकुरा दिनसक्ने
नयाँ वर्ष‚ नआएकै जाती
वाक्क ब्याक्क भइसकेको
पुरानै शुभकामना 
नयाँ वर्षको खाममा दिन
बरु नयाँ वर्ष नआएकै जाती

दमौली