आफूले गरेको आक्रमणको बदला इजरायलले लिन खोज्ने हो भने थप क्षतिको सामना गर्नुपर्ने चेतावनी इरानले दिएको छ ।

शनिवार राति इरानले इजरायलमाथि ३ सय भन्दा बढी ड्रोन र मिसाइलले आक्रमण गरेको थियो । इरानले यो आक्रमण गत अप्रिल १ तारिखका दिन सिरियाको दमास्कसमा आफ्नो वाणिज्य दूतावासमा भएको आक्रमणको बदला भनेको छ ।

इरानका राष्ट्रपति इब्राहिम रायसीले आइतवार एक विज्ञप्ति जारी गर्दै भनेका छन्, 'इजरायल वा यसका समर्थकहरूले लापरबाही व्यवहार देखाउँछन् भने उनीहरूले निर्णायक र धेरै कडा प्रतिक्रिया पाउनेछन् ।'
उनले संयुक्त राज्य अमेरिकालाई यो मामिलाबाट टाढै रहन चेतावनीसमेत दिएका छन् ।

यसअघि इरानका सैन्य प्रमुख मेजर-जनरल मोहम्मद बगेरीले यस्तै चेतावनी दिएका थिए । उनले भनेका थिए, 'इरानविरुद्ध इजरायलले बदला लियो भने हामी निकै ठूलो र भयानक प्रतिक्रिया दिनेछौं ।'

उनले इरानले दमास्कस घटनाको बदला लिइसकेकाले थप युद्ध नचाहेको प्रष्ट पारेका छन् ।

इरानको सरकारी टेलिभिजनमा बोल्दै उनले भनेका थिए, 'इजरायलमा आक्रमण गरेर हामीले हाम्रो सबै लक्ष्यहरू हासिल गरिसकेका छौं, हाम्रो अपरेशन समाप्त भएको छ र हामीले यसलाई जारी राख्न चाहँदैनौं ।'

यसअघि उनले अमेरिकालाई चेतावनी दिँदै अमेरिकाले इजरायलको जवाफी कारबाहीलाई समर्थन गरेमा अमेरिकालाई नै निशाना बनाउने चेतावनी दिएका थिए ।