नेपाली कांग्रेसले गण्डकी र सुदूरपश्चिम प्रदेशमा सरकार गठनको प्रक्रियामा संविधानविपरीतको कदम चालिएको आरोप लगाएको छ ।

कांग्रेस सभापति शेरबहादुर देउवाले पार्टीका शीर्ष नेतासँगको भेटमा गण्डकी र सुदूरपश्चिमको सरकारका लागि प्रदेश प्रमुखले नै संविधानविपरीत काम गरेको बताएका हुन् ।​

बेठकपछि कांग्रेस प्रवक्ता डा प्रकाशशरण महतले सभामुखलाई समेत गणना गरेर गण्डकीमा मुख्यमन्त्री बन्ने र सुदूरपश्चिममा पनि बहुमतसहित नागरिक उन्मुक्तिका लक्ष्मणकिशोर चौधरीलाई अगाडि सार्दा प्रदेश प्रमुख नजिर मियाँले रोक्नु असंवैधानिक रहेको बताए ।

नागरिक उन्मुक्तिका दुवैको दाबेदारीलाई खारेज गरेपछि पनि सुदूरपश्चिममा संकट टरेको छैन । 

माओवादीले नेकपा एसका दीर्घ सोडारीलाई मुख्यमन्त्री बनाउने वचन दिए पनि एमालेले मानिरहेको छैन । जसले सत्ता समीकरणमै तनावको स्थिति सिर्जना गरेको छ ।

‘गण्डकी र सुदूरपश्चिममा प्रदेश प्रमुखले नै संविधान विपरीत काम गर्नुभएको छ । यो अदालतको व्याख्याको समेत विपरीत हो', उनले भने, ‘सभामुखलाई गणना गरेर गण्डकीमा एमालेका खगराज अधिकारीको दाबी पेश गर्ने मुख्यमन्त्री बनाउने शिवराज भट्टको कदम गलत छ । यसविरुद्ध कानूनी प्रक्रियामा हामी गइसकेका छौं ।’