काठमाडौं २ पुस– यसपटकको प्रतिनिधि सभा निर्वाचन मार्फत राष्ट्रिय दल बन्ने लक्ष राखेको विवेकशील साझा पार्टीले सो लक्ष पूरा नभएपनि पूर्वप्रधानमन्त्री र वहालवाला उपप्रधानमन्त्रीको पार्टीले भन्दा धेरै भोट पाएको छ । 

आइतवार सम्पन्न समानुपातिकको मतगणना नतिजा अनुसार विवेकशील पार्टीले २ लाख १२ हजार ३ सय ६६ मत पाएको छ । जबकि बहालवाला उपप्रधानमन्त्री कमल थापाको राप्रपाले १ लाख ९६ हजार ७ सय ८२ मत पाएको छ । 

विवेकशीलले पूर्वप्रधानमन्त्री डा बाबुराम भट्टराई नेतृत्वको नयाँ शक्ति पार्टीले भन्दा दोब्बर भन्दा धेरै भोट पाएको छ ।

प्रत्यक्ष तर्फ प्रतिनिधि सभामा १ र प्रदेश सभामा २ सिट जितेको नयाँ शक्तिले समानुपातिकमा देशभरबाट ८१ हजार ८ सय ३७ भोट पाएको छ । 

नयाँ शक्ति र विवेकशील दुवैले आफूहरुलाई राजनीतिको बैकल्पिक धारको रुपमा दावी गर्दै आएका छन् । 

विवेकशील साझा पार्टीका प्रवक्ता सूर्यराज आचार्यले पूर्वप्रधानमन्त्री र बहालवाला उपप्रधामनन्त्रीको पार्टीले भन्दा आफूहरुले धेरै भोट पाएबाट आफूहरुले बैकल्पिक राजनीतिक धारको नेतृत्व गर्न सक्ने विश्वास बढेको बताए । 

‘राष्ट्रिय पार्टी बन्ने लक्ष पूरा नभएपनि जनताको मन जितेका छौ’ आचार्यले लोकान्तरसंग भने ।

विवेकशीलले तीन नम्बर प्रदेशको प्रदेश सभामा प्रतिनिधित्व जनाउन पाउने छ ।