धनगढी- नेत्र विक्रम चन्द (विप्लव) नेतृत्वको नेपाल कम्युनिष्ट पार्टीनिकट एक समूहले करीब ३ घण्टा केरकारपछि सुदूरपश्चिम प्रदेश सभा सदस्य देवकी मल्ललाई अपहरण मुक्त गरेको छ ।

बझाङ जिल्लाको केदारसिंह गाउँपालिकास्थित एउटा कार्यक्रममा सहभागी हुन जाने क्रममा उनी सो समूहको अपहरणमा परेकी थिइन् । उनलाई सो समूहले करीब ३ घण्टा केरकार गरेपछि मात्रै साढे ३ बजेतिर अपहरणमुक्त गरेको हो । अपहरणमुक्त भई हाल उनी स्थानीय प्रहरीको सम्पर्कमा रहेको जिल्ला प्रहरी कार्यालय बझाङका प्रहरी निरीक्षक नयनबहादुर साउदले जानकारी दिए ।

विप्लव निकट स्रोतका अनुसार विप्लव माओवादीले माघ २८ गते जिल्लाको देउराउ भन्ने स्थानमा कार्यक्रम आयोजना गरेको थियो । सो कार्यक्रममा प्रहरी हस्तक्षेप हुनुको साथै विप्लव नेतृत्वको पार्टीका केन्द्रीय सदस्यलाई प्रहरीले गिरफ्तार गरेको थियो । सो विषयलाई लिएर शुक्रवार प्रदेश सभा सदस्य मल्ललाई नियन्त्रणमा लिएको विप्लव निकट स्रोतले पुष्टी गर्‍यो । ‘हामीले महिलाकै कार्यक्रम आयोजना गरेका थियौं । तर हाम्रो कार्यक्रममा हस्तक्षेप भयो । सो विषयलाई लिएर उहाँलाई नियन्त्रणमा लिएर बुझेर छोडेका हौंं,' विप्लव निकट स्रोतले लोकान्तरलाई बतायो ।

प्रदेशसभा सदस्य मल्ल बझाङ (ख) बाट माओवादी केन्द्रबाट निर्वाचित भएकी थिइन् ।