बाबुरामको टिप्पणी - रेशम, सीके र विप्लव प्रकरणमा सरकार नराम्ररी चिप्लियो

धनगढी- पूर्वप्रधानमन्त्री तथा नयाँ शक्ति पार्टी नेपालका संयोजक डा. बाबुराम भट्टराईले वर्तमान सरकारले रेशम चौधरी, सिके राउत र विप्लव प्रकरणमा निकास दिन नसकेको बताएका छन् ।

बुधवार धनगढीमा आयोजित खुला अन्तरसंवाद कार्यक्रमलाई सम्बोधन गर्दै उनले ती तीन प्रकरणमा राज्यले निकास दिन नसकेको दावी गरेका हुन् । ‘एकातिर देशलाई नै २ टुक्रा बनाउछु् भन्ने पृथकतावादी सिके राउतलाई अत्यन्त अपारदर्शी ढंगले जेलमै रहेको बेला प्रधानमन्त्रीले भेट्ने, भित्रभित्रै सम्झौता गर्ने गर्ने र अदालतमा सेटिङ मिलाएर मुक्त गरिदिने । अनि भोलिपल्ट ठूलो तामझामका साथ प्रचार गर्ने, मानौं कि सिके राउत महानायक हुन्’, उनले आक्रोश व्यक्त गरे, ‘शान्ति प्रक्रियामा आएका छन् भने हामी स्वागत गर्न चाहन्छौं । तर यति नाटक किन गर्नुपरेको? अदालतलाई नै प्रभावित गरेर छुट्न लगाउने, भोलिपल्ट सम्झौता गर्ने ? हतार–हतारमा गर्नुको पछाडि केही छ भनेर जनताले शंका गरेका छन् ।’

सिके राउतसँग भएको सहमतिको २ नम्बर बु्ँदामा ‘जनअभिमत आधारित लोकतान्त्रिक विधि’ उल्लेख भएको बताउँदै उनले लोकतन्त्रमा जनअभिमतमा आधारित भन्नुको औचित्य नभएको औंल्याए । जसबाट दोहोरो अर्थ लगाएर राष्ट्रियतामाथि खेलवाड समेत भएको डा. भट्टराईको भनाइ थियो ।

त्यस्तै, उनले टीकापुर घटनालाई आपराधिक रुपमा अदालतमा लैजानु गलत भएको बताएका छन् । सरकारले राजनीतिक रुपमा समस्या समाधान गर्नुपर्नेमा अदालत लगेकोमा भट्टराईले दुःख व्यक्त गरे ।

‘प्रदेशको सीमांकनको विषयमा असन्तुष्टी लिएर र पहिचानका लागि गरेको थारुहरुको आन्दोलन राजनीतिक आन्दोलन थियो’, उनले भने, ‘टीकापुर आन्दोलनलाई सरकारले राजनीतिक रुपमा समाधान गर्नुपर्छ र यो नै बुद्धिमानी हुन्छ । दण्ड दिएर झन् घाउ मात्रै चहर्याउँछ र थप द्वन्द्वको वातावरण बनाउँछ ।’

यसैबीच उनले टीकापुर घटनाबारे नयाँ खुलासा गरेका छन् । नेपाल रेडक्रसका एक जनाबाट पाएको जानकारीलाई उदृत गर्दै भने, ‘सांसद् रेशम चौधरीलगायत जन्मकैद सुनाइएका ११ जनामध्ये ५ जना घटना घट्नुभन्दा पहिला प्रहरीबाट चलाएको गोलीबाट घाइते भएर अस्पताल भर्ना भएका थिए ।'

तर तिनीहरुलाई जन्मकैद सुनाइएकोप्रति भट्टराईले असन्तुष्टि जनाए । उनले विप्लव समूहलाई पनि दमन गरेर समस्या समाधान नहुने बताएका छन् । भट्टराईले विप्लवले हिंसात्मक गतिविधि गरेर राजनीतिक उपलब्धी प्राप्त गर्न नसक्ने बताए । विप्लव समूह र सरकारले आफ्नो नीतिमा पुनर्विचार गरी निरन्तर बहस संवाद गरेर समस्या समाधान गर्नुपर्ने भट्टराईको भनाइ छ । टीकापुर घटनाबारे चिरफार गर्न सांसद रेशम चौधरी पत्नी रञ्जितासहित कैलाली पुगेका भट्टराईले कैलालीको टीकापुर र धनगढीमा खुला अन्तरसंवाद गरी बुधवार काठमाडौं फर्केका छन् ।