पोखरा- पोखरामा १६ औं फेवा नववर्ष महोत्सव शुरू भएको छ । शुक्रवार फेवातालको किनारास्थित कोमागाने पार्कमा आयोजित महोत्सवको गण्डकी प्रदेशका मुख्यमन्त्री पृथ्वीसुब्बा गुरुङले उद्घाटन गरे ।

कार्यक्रममा मुख्यमन्त्री गुरुङले पोखरालाई महोत्सवको शहर बनाउन आवश्यक रहेको बताए । 'पोखरालाइ महोत्सवको शहर बनाएर धेरै भन्दा धेरै पर्यटक भित्राउन आवश्यक छ,' उनले भने, 'आन्तरिक तथा बाह्य पर्यटक भित्राउने एउटा विकल्प महोत्सव पनि हो ।'

मुख्यमन्त्री गुरुङले पोखरामा ठूलो संख्यामा पर्यटकलाई आकर्षित गर्न आवश्यक रहेको बताए । प्राकृतिक र सांस्कृतिक रूपमा धनी पोखरालाई स्वर्गजस्तो शहर बनाउन जरुरी भएको उनको भनाई थियो ।

'जीवनमा एक पटक पोखरा पुग्नै पर्छ भन्ने वातावरण बनाउन आवश्यक छ,' उनले भने, 'समग्र प्रदेशको समृद्धिको आधार पर्यटनलाई मानेर प्रदेश सरकारले आफ्ना गतिविधिहरु अगाडि बढाइरहेको छ।'

उनले पोखरामा एक हजारभन्दा बढी अट्न सक्ने ठूलो क्षमताको सभाकक्ष आवश्यक रहेको बताउँदै यस क्षेत्रमा धेरै शैय्या भएको ठूलो अस्पतालको समेत आवश्यकता औंल्याए ।

मुख्यमन्त्री गुरुङले प्रदेशको समृद्धिका आधारको रुपमा रहेको पोखरा कोरला नाका, पचभैयामा चिडियाखाना निर्माण र पोखरामा दुई बसपार्क निर्माण दुईवर्षभित्र सम्पन्न गर्ने योजनामा प्रदेश सरकार लागेको बताए ।

फेवा तालको संरक्षणका लागि प्रदेश सरकारले १० करोड रुपैयाँ विनियोजन गरिसकेको बताउँदै उनले दुई वर्षभित्र पोखरा अन्तर्राष्ट्रिय विमानस्थल निर्माण सम्पन्न हुने दाबी गरे ।

गण्डकी प्रदेशका सभासद राजीव पहारीले फेवा ताल लगायतका तालको संरक्षणप्रति आफ्नो विशेष चासो रहेको बताए । उनले लेकसाइड मात्र पर्यटकीय क्षेत्र नभएको बताउँदै समग्र गण्डकी प्रदेश नै पर्यटकीय क्षेत्र भएको दाबी गरे ।

पोखरा पर्यटन परिषद्का अध्यक्ष चिरञ्जीवि पोखरेलले पोखरा काठमाडौं जोड्ने पृथ्वी राजमार्गलाई ४ लेनको बनाउन जरुरी रहेको बताए ।

महोत्सव उद्घाटनका अवसरमा ३६ समुहले झाँकी प्रतियोगितामा सहभागिता जनाएका थिए । महोत्सवमा गण्डकी प्रदेशस्तरीय नृत्य प्रतियोगिता पनि आयोजना गरिने छ ।

नेपाली संस्कृतिको संरक्षण गर्दै फेवा ताल संरक्षणमा सचेतना फैलाउन आयोजित महोत्सवमा पर्यटक दौड, बाल उद्यान र पप कन्सर्ट जस्ता आकर्षण पनि समेटिएका छन् । महोत्सवमा विविध नेपाली खानाको बिक्री र प्रदर्शनी समेत गरिने आयोजकले जनाएको छ । 

महोत्सव संचालन गर्न संघका अध्यक्ष विकल तुलाचनको संयोजकत्वमा विभिन्न २९ उपसमितिहरु गठन गरिएको छ । महोत्सव सम्पन्न गर्न ६५ लाख रुपैयाँ खर्चको अनुमान गरिएको छ ।

संघ आबद्ध होटलको मेन्युमा १५ प्रतिशत छुट

महोत्सवका अवसरमा संघ अन्तर्गतका सदस्य होटलको मेन्युमा १५ प्रतिशत छुट प्रदान गरिएको पराजुलीले जानकारी दिए । महोत्सवका बेला ग्राहकलाई कुनै व्यवसायीले ठगी गरे त्यस्ता व्यवसायीका बारेमा जानकारी दिन आग्रह गरे । उनले होटलको अकुपेन्सी दर न्यून रहेको भन्दै चैत ३० गते रातिका लागि भने कोठाहरु अधिकांश बुक भएको जानकारी दिए ।

नेपाल भ्रमण वर्षको ओपनिङ शनिबार

नेपाल भ्रमण बर्ष २०२० कार्यक्रम कार्यान्वयन समितिका सदस्य एवं नेपाल पर्यटन बोर्डका सदस्य विप्लव पौडेलले फेवा महोत्सव आयोजना स्थलमा चैत ३० गते भ्रमण वर्षको 'सफ्ट ओपनिङ' गरिने जानकारी दिए । स्थानीय विभिन्न संघसंस्थासँग मिलेर कार्यक्रमलाई भव्य बनाउन समन्वय भइहेको उनले बताए ।

बोर्डको गण्डकी प्रदेश कार्यालयका प्रमुख मणिराज लामिछानेले भ्रमण वर्ष कार्यक्रम घोषणाको अन्तिम तयारी सकिएको जानकारी दिए ।