संसार अन्त्य हुन लागेको भन्दै नौ वर्षदेखि घरमुनि लुकिरहेको परिवारको उद्धार

काठमाडौं – नेदरल्यान्ड्सको रुइनरवोल्डमा रहेको एक फार्महाउसको गोप्य सेलरमा लुकिरहेको एक परिवारलाई प्रहरीले उद्धार गरेको छ । उक्त परिवारमा ६ सदस्य छन् ।

जेठो छोरो फार्महाउसबाट निस्केर नजिकैको पबमा सहायता माग्न गएपछि प्रहरी त्यहाँ पुगेको हो । उक्त परिवार पूरै एकान्तजीवी भएर नौ वर्षदेखि संसार अन्त्य हुने प्रतीक्षा गरेर बसिरहेको थियो । 


Advertisement

आइतवार राति जेठा छोरा नजिकैको पब पुगेका थिए । आफू राति निस्केको किनकि दिउँसो निस्कन सम्भव नभएको उनले बताए । उनी फोहरी, जिङरिङ्ग र किंकर्तव्यविमूढ देखिएको पब मालिकले बताए । आफू दाजुभाइ दिदीबहिनसँग फार्ममा बसिरहेको किनकि आफूहरूले बाँच्ने तरिका अन्त्य गर्न चाहेको बताए । 

सन्तानहरू र ओछ्यान परेका एक व्यक्ति फार्महाउसको सेलरमा नौ वर्षदेखि बसिरहेको डच मिडियाले बतायो । घटनाको अनुसन्धानमा सहयोग नगर्ने परिचारक जोसेफ बीलाई पक्राउ गरिएको छ । 

दाजुभाइ दिदीबहिनी घरको बेसमेन्टमा बस्थे र त्यहाँ पुग्न एउटा दराजपछाडिको गोप्य भर्‍याङ मात्र थियो । दाजुभाइ दिदीबहिनीलाई संसारमा अरू मान्छे छन् भन्ने समेत थाहा थिएन । 

घर आफैंमा नहरपारि एकलासे ठाउँमा थियो र त्यहाँ पुग्न एउटा पुल मात्र थियो । पुललाई ताल्चा लगाइएको ढोकाले छेकिएको थियो । यसको छानबिन गर्न खोज्ने छिमेकीहरूले घरमा सीसीटीभी क्यामराहरू प्रशस्त राखिएको बताए । 

जेठा छोराका अनुसार, उनीहरू कहिले पनि विद्यालय गएनन् र उनीहरूलाई स्थानीय अधिकारीहरूले पञ्जीकरण पनि गरेका थिएनन् । परिवार आत्मनिर्भर थियो र उनीहरू घरैमा तरकारी खेती र पशुपालन गरेका थिए । 

उक्त परिवार फार्महाउसमा पुग्नुअघि नै आमाको मृत्यु भइसकेको विश्वास गरिएको छ । 

घरमा जोसेफ बी मात्र देखिने गरेका थिए । छिमेकीहरूले उनलाई दिनदिनै फार्मबाट ओहोरदोहोर गरेको देखेका थिए । उनले भित्र पस्न खोज्नेहरूलाई भगाउन दूरबीनले हेर्ने गरेको छिमेकीहरूले बताए । 

प्रहरीले यो परिवार यति लामो समयसम्म कसरी एकलासे जीवन बिताउन सक्यो अनि परिवारसँग जोसेफ बीको कस्तो सम्बन्ध छ भनी अनुसन्धान गरिरहेको छ । दाजुभाइ दिदीबहिनीहरूलाई घरबाट अन्तै लगिएको छ ।

आरटीबाट

कमेन्ट गर्नुहोस्