गुडिरहेको कारलाई नियन्त्रणमा लिएर लुटपाट गर्ने ६ जना युवाहरू पक्राउ परेका छन् ।

गेटा बिस्कुट फ्याक्ट्रीका कर्मचारी सुमित भट्टको बा१८च ९६४३ नम्बरको निसान गाडी रोकेर लुटपाट गर्ने ६ जनालाई पक्राउ गरेका जिल्ला प्रहरी कार्यालय कैलालीले जनाएको छ ।

जिल्ला प्रहरी कार्यालयका प्रवक्ता प्रहरी नायब उपरिक्षक दक्षकुमार बस्नेतले लुटपाटमा संलग्न कञ्चनपुरको भीमदत्त नगरपालिका वडा नम्बर १४ का १८ वर्षीय अजय भण्डारी, भीमदत्त नगर ३ बस्ने २१ वर्षीय गौरब चन्द,  भीमदत्त नगरपालिका ४ को २६ वर्षीय चिरण बम, कृष्णपुर १ का १९ वर्षीय नरेन्द्र साउँद, कृष्णपुर घर भई धनगढी उपमहानगरपालिका वडा नम्बर ३ बस्ने २० वर्षीय प्रदीप ऐर र दार्चुलाको मार्मा गाउँपालिका २ घर भएर धनगढी बस्ने १८ वर्षका पारस सिंहलाई पक्राउ गरिएको जानकारी दिए ।

आइतबार रातीे बिस्कुट फ्याक्ट्रीका कर्मचारी सुमित भट्ट आइरहेका थिए । उनीहरूले रड देखाएर मोवाइल लगायतका सामान लुटेका थिए । लुटपाटपछि प्रहरीको एक सय नम्बरमा भट्टले जानकारी गराएका थिए ।

 तत्कालै जिल्ला प्रहरी कार्यालय र अस्थायी प्रहरी विट चटकपुरका प्रहरी सहायक निरिक्षक गजेन्द्र चन्दको नेतृत्वमा खटिएको संयुक्त टोलीले धनगढी क्षेत्रबाटै उनीहरूलाई राती नै पक्राउ गरेको हो ।  

पक्राउ परेका ५ जना युवा धनगढीमा हुने अन्य चोरीमा पनि संलग्न भएको आशंका गरिएको छ। 

उनीहरूको साथबाट प्रहरीले बा ६५ प ५५९ नम्बरको मोटरसाईकल पनि बरामद गरेको  प्रहरीले जनाएको छ । पक्राउ परेकाहरूवारे थप अनुसन्धान जारी रहेको जिल्ला प्रहरी कार्यालयले जनाएको छ ।