काठमाडौं– प्रमुख प्रतिपक्षी दल नेपाली कांग्रेसले भारतबाट आयात हुने तरकारी र फलफूलमा विषादी परीक्षण गर्ने काम रोकेर सरकारले शक्ति केन्द्रसामु घुँडा टेकेको आरोप लगाएको छ ।

कांग्रेसले विषादी परीक्षण रोक्नेसम्बन्धी निर्णयबारे सदनमा जवाफ माग गरेको छ ।

प्रतिनिधि सभाको आइतवार बसेको बैठकको शुरूमै सभामुखसँग समय लिएर नेपाली कांग्रेसका प्रमुख सचेतक बालकृष्ण खाणले सरकारले जनताको जीवनमा खेलबाड गरेको आरोप लगाएका हुन् ।

‘सरकारले नै भन्यो नेपालमा आयात गर्ने फलफूल तरकारी, विषादीयुक्त खाद्य सरकारमा आउन दिन्नँ भनेर जनताले खुशी मनाए, विषाक्त तरकारी खाएर बिरामी पर्नु परेन भनेर,’ खाणले भने, ‘जनताको जीवनको रक्षाको गर्नुपर्ने सरकारले जस्ताको तस्तै आउन दिने निर्णय गरेर घुँटा टेकेको छ, शक्ति केन्द्रका सामु निरीह र लम्पसार भएको छ ।’

खाणले थपे– 'भारतबाट आउने तरकारी किन रोक्नु भयो, किन घुँडा टेकेर खोल्नुभयो ? यसबारे सम्बन्धित मन्त्रीले तत्काल जवाफ दिनुपर्छ ।