विश्वव्यापी महामारीको रुपमा फैलिरहेको कोभिड १९ को रोकथाम गर्ने भन्दै २ नेपाल र भारतको देशीय सबै सीमा नाकाहरू सील गरिएको भएपनि चोरी र तस्करी निर्वाध रुपमा भैरहेको पाइएको छ ।

जिल्ला प्रशासन कार्यालय कैलालीले सोमबारदेखि अनिश्चितकालिन निषेधाज्ञा जारी गर्नुका साथै सरकारले नै मंगलवार विहान ६ बजेदेखि पूरै देश लकडाउन गरेको अवस्थामा पनि कैलाली जिल्ला संग जोडिएका सीमा नाकाहरूमा चोरी तस्करी भैरहेको स्थानीयहरूले बताएका छन् ।

कैलालीको कैलारी गाउँपालिका १ हसुलियाका बतासु चौधरीले सीमा क्षेत्रमा फितलो सुरक्षा व्यवस्था र आमजनतामा जनचेतनाको अभावका कारण सीमावर्ती क्षेत्रबाट चोरी तस्करी भैरहेको जानकारी दिए । उनले गए रातीको समयमा बोइलर कुखुरा, मंगुर माछालगायत वस्तुहरू भित्रिरहेको बताए ।

उनका अनुसार भारतको उत्तरप्रदेशको खिरी जिल्लाको सीमावर्ती बजार सुदा, सौनाहा, चन्दनचौकी, नेपालीतिरको पलिया बिसनपुर, मोहनपुर क्षेत्रको सीमा क्षेत्रको अबैध बाटो प्रयोग गरी तस्करी जारी रहेको छ ।

उसो त नेपालले मात्रै होइन भारत तथा भारतको उत्तरप्रदेश सरकारले पनि लकडाउनको घोषणा २ दिन अगाडीदेखि नै गर्दै आएको छ । यद्यपी चोरी तस्करी नरोकिएको प्रशासनले सीमा क्षेत्रमा कडा रुपमा निगरानी बढाउनुपर्ने स्थानीयको माग छ ।

कैलालीका प्रमुख जिल्ला अधिकारी यज्ञराज बोहराले सीमा क्षेत्रमा गस्ती बढाइएको बताउँदै अझ प्रभावकारी गस्ती बढाउन सीमा सुरक्षा बललाई निर्देशन दिएको बताए । निषेधाज्ञालाई उलंघन गर्नेलाई कैद र जरिवानासहित हदैसम्मको कारवाही हुने प्रजिअ बोहराको भनाइ छ ।