प्रादेशिक अस्पताल जनकपुरले कोरोनाभाइरस (कोभिड– १९)लाई मध्यनजर गर्दै ५० शय्या सहितको आइसोलेसन वार्ड निर्माणको काम थालेको छ ।

प्रदेश अस्पतालकै स्वामित्वमा रहेको जनकपुर नर्सिङ क्याम्पसको भवन परिसरमा ५० शय्याको लेभल २ तहको आइसोलेसन वार्ड निर्माण भइरहेको छ ।

प्रादेशिक अस्पताल जनकपुरका निमित्त मेडिकल सुपरिटेन्डेन्ट डा. जामुनप्रसाद सिंहका अनुसार संघीय सरकारले गरेको निर्णय तथा निर्देशनअनुसार उक्त वार्ड निर्माणको काम शुरू गरिएको हो ।

हुन त पहिले पनि प्रादेशिक अस्पताल जनकपुरको इमर्जेन्सी वार्डको माथिल्लो तलामा १२ शय्याको आइसोलेसन वार्ड पहिलेदेखि नै सञ्चालनमा आइसकेको छ ।

संघीय सरकारले पछिल्लो समयमा प्रदेश २ को प्रादेशिक अस्पताल जनकपुर र नारायणी अस्पताल वीरगञ्जलाई लेभल २ को अस्पताल तथा सगरमाथा अस्पताल राजविराज र जनकपुरको जानकी मेडिकल कलेजलाई लेभल १ तहको कोरोनाको उपचार गर्ने अस्पताल निर्माण गर्ने भनेर निर्णय गरिएकाले नयाँ संरचना निर्माण भइरहेको छ । 

प्रादेशिक अस्पतालमा इमरजेन्सीबाहेक अन्य नियमित सेवाहरू समेत सञ्चालन गर्नुपरेको तथा ती सेवा सुविधा रहेको अस्पताल परिसरबाट बाहिर परिसरमा कोरोनाको अस्पताल सुचारू गर्नु भनेर निर्णय गरेपछि नर्सिङ क्याम्पसमा तयारी थालिएको सिंहले बताए । 

नर्सिङ क्याम्पसको पछाडितर्फ सडक र बस्ती समेत भएकाले स्थानीयबासीहरूले भने त्यसको विरोध गरेका छन् ।

वडा नम्बर १० का स्थानीयवासीले शुक्रवार पत्रकार सम्मेलन नै गरेर उक्त कुराको विरोध गरेका छन् ।

‘बस्ती तथा आवादी समेत रहेको ठाउँमा आइसोलेसन वार्ड सञ्चालन गर्दा स्थानीय मानिसमा समेत कोरोनाको संक्रमण बढ्न सक्ने खतरा छ,’ स्थानीय मनोजकुमार झा, सुशील कर्ण, सहितका दर्जनौं मानिसले भने, ‘कोरोनाको वार्ड नै चलाउने हो भने अस्पताल परिसरभित्र सञ्चालन गर्नुपर्‍यो ।’ 

नभए अन्य वैकल्पिक स्थानतर्फ आइसोलेसन वार्ड सञ्चालन गर्नुपर्ने स्थानीयको मागमा वडाध्यक्ष मिथिलेश कर्णले पनि सहमति जनाए ।

‘प्रदेश सरकारसँग मुजेलियाको मणिपाल अस्पताल, बसहियाको इञ्जिनीयरिङ क्याम्पससहितको विकल्प छ,’ वडाध्यक्ष कर्णले भने, ‘ती स्थान जहाँ मानिसको बस्ती छैन त्यहाँ सञ्चालन गर्नुपर्छ ।’

स्थानीयले विरोध गर्नु स्वाभाविक नै भएको भन्दै डा. सिंहले भने, ‘स्थानीय मानिसहरूले चिन्ता गर्नु परेन । हामीले त्यसको सम्पूर्ण सुरक्षाको समेत बन्दोबस्त गरेका छौं ।’

उनका अनुसार आइसोलेसन वार्डमा रहेको सम्पूर्ण झ्याललाई सीलबन्द गर्नुका साथै एयर कन्डिसन (एसी)को जडान गरिँदैछ ।

त्यसका बाहेक कोठामा सीसीटीभी क्यामेरा जडान हुनेछन् । बाहिर सडकमा स्प्रे गरिनेछ । 

‘स्थानीय मानिसमा कोरोनाको संक्रमण रोक्न हामी सचेत छौं,’ सिंहले थपे, ‘हामीले रोकेर रोकिन्न, संघ र प्रदेश सरकारले गरेको निर्णय र निर्देशन अनुसार आइसोलेसन वार्ड निर्माण भइरहेको छ ।’