अब पाठकले नेपाली पुस्तक पढ्दा र सुन्दा साहित्यकारले रोयल्टी पाउने

नेपाली भाषामा पूर्णरूपमा साहित्यिक सामग्री पस्कने अनलाइन पोर्टल सार्वजनिक भएको छ । 

व्यावसायिक साहित्यिक पत्रकारिताको खाँचो पूरा गर्न साहित्यपोस्ट डट्कम बजारमा ल्याएको प्रधानसम्पादक अश्विनी कोइरालाले बताएका  छन् । उक्त पत्रिका  बुद्ध जयन्ती, उभौली पर्व र गुरु गोरख जयन्तीको अवसर पारेर बिहीवार सार्वजनिक गरिएको हो । 


Advertisement

हिन्दु, बौद्ध र  किँरात धर्मका महत्वपूर्ण पर्व एकै दिन परेका कारण सबै भाषा, संस्कृति र  साहित्य प्रेमीलाई समेट्न यो उपयुक्त दिन हुने कोइरालाले बताएका छन्  ।

साहित्यपोस्ट डटकमले नेपाली भाषा, साहित्य र संस्कृतिका सामग्री पस्कने बुझिएको छ । यो अनलाइनमार्फत अडियो बुक, डिजिटल बुक र भिडियो बुक पढन,  सुन्न र हेर्न सकिने छ । 


Advertisement

‘प्रारम्भमा हामी अक्षर र दृश्यमार्फत पाठकमाझ पुग्नेछौ । केही समयपछि अडियो र डिजिटल बुक पनि यसैमार्फत हेर्न, पढ्न र सुन्न सकिनेछ ।’ कोइरालाले भने, ‘प्राविधिकरुपमा बलियो बनाउनु पर्ने आवश्यकताका कारण अडियो बुक र डिजिटल पुस्तक पाठकसम्म पुग्न केही समय लाग्ने छ ।’

पछिल्लो समय डिजिटल पुस्तकको बजार बढ्दै गएको र सम्पूर्ण साहित्यिक सामग्री एकै थलोबाट प्राप्त गर्न सजिलो होस् भन्ने अभिप्रायले साहित्यपोस्टको योजना बनेको बताइएको छ । विदेशमा रहेका पचास लाख नेपालीहरुले एकै ठाउँ भाषा, साहित्य र संस्कृतिका सामग्री प्राप्त गर्न सजिलो बनाउने योजना रहेको पनि कोइरालाले बताए । 

‘नेपालभित्र पनि गाउँ गाउँमा साहित्यिक सामग्री पुग्न सकेका छैनन् ।’ प्रधानसम्पादक कोइराला भन्छन्, ‘विद्यालयहरुले पनि आफ्ना विद्यार्थीहरुलाई त्यही माध्यमद्वारा साहित्यिक सामग्री पठाउन सकून् भन्ने चाहाना छ ।’

पाठकहरुले सुनेका र पढेका प्रत्येक सामग्रीबाट लेखकले रोयल्टी पाउने भएकाले यसबाट साहित्यकारहरुको आम्दानीमा पनि बृद्धि हुने अपेक्षा  गरिएको छ । कोइरालाका अनुसार आधा घन्टादेखि एक घन्टा बीचका अडियो पुस्तक एक पटक पाठकले सुन्दा लेखकले कम्तिमा दुई रुपैंया प्राप्त गर्नेछन् । कम्प्युटरमार्फत कुन पाठकले कुन पुस्तक कतिपल्ट कति समय लगाएर सुने,  त्यसको अटोमेटिक विधिमार्फत गणना गरिने भएका कारण लेखकहले पाठकले सुनेअनुसारकै रोयल्टी पाउने दावी गरिएको छ । 

दुई दशक कान्तिपुर पब्लिकेसन्समा पत्रकारिताको अनुभव सँगालेका कोइराला पछिल्लो दुई वर्ष यता अनलाइनखबर डटकमका साहित्य विभागमा कार्यरत थिए । साहित्यपोस्ट सञ्चालनमा आउने भएपछि उनले अनलाइनखबरबाट उनले अवकास लिएका हुन् ।  

‘साहित्यमै केही गर्ने उद्देश्यका साथ कान्तिपुर पब्लिकेसन्सको स्थायी जागीर छाडेको थिएँ । एक वर्ष विभिन्न किसिमको सर्भे गरेँ । साहित्यमा पनि भविष्य छ भन्ने निक्र्याैलपछि अरु अवसर छाडेर साहित्यपोस्टमा आएको हुँ ।’ कोइरालाले भने, ‘जबसम्म देशमा पठन संस्कृति बलियो हुन्न, देश विकास हुन्न । विकसित देशका  भाषा, साहित्य र संस्कृतिको फैलावटले पनि उनीहरुको सम्पन्नतामो ठूलो भूमिका खेलेको छ । यहि कारण नेपाली भाषामा पनि सजिलो, सस्तो र सुलभरुपमा आम जनतासम्म साहित्य पुर्याउने हाम्रो योजना हो ।’

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्